Միացյալ Նահանգները կրկին վետո է դրել ՄԱԿ-ի անվտանգության խորհրդի այն բանաձևի վրա, որով դատապարտվում է իսրայելական բնակավայրերի կառուցումը պաղեստինյան տարածքներում` Հորդանանի Արևելյան ափում և Արևելյան Երուսաղեմում: Այս մասին հաղորդում է CNN-ը:
Բանաձևը հեռախոսազրույցի ժամանակ քննարկել են ԱՄՆ նախագահ Բարաք Օբաման և Պաղեստինի ինքնավարության ղեկավար Մահմուդ Աբասը, սակայն նրանց այդպես էլ չի հաջողվել համաձայնության գալ: Բանաձևը ՄԱԿ-ի անվտանգության խորհուրդ էր մտել այն բանից հետո, երբ դրան աջակցություն էին հայտնել ՄԱԿ-ի 130 անդամ երկրներ:
Ամերիկայի ներկայացուցիչը ՄԱԿ-ում` Սյուզան Ռայսը, լրագրողներին հայտնել է, որ ԱՄՆ դիրքորոշումն այս հարցում այն է, որ բանաձևն այս տեսքով կարող է հանգեցնել կողմերի դիրքորոշումների խստացմանը և բանակցային գործընթացի տապալմանը: Նա միաժամանակ նշել է, որ ամերիկյան վարչակազմը չի աջակցում իսրայելական դիրքորոշմանը պաղեստինյան տարածքներում հրեական բնակավայրերի կառուցման հարցում: