Ռուսաստանի փոխարտգործնախարար Գրիգորի Կարասինը երեկ ղարաբաղյան հակամարտության կարգավորման մասին խոսելիս հայտարարել է, թե Ռուսաստանը հույս ունի, որ բանակցային գործընթացում շուտով առաջընթաց կգրանցվի: «Արդարացի ու ազնիվ ձևով անում ենք ամեն հնարավոր բան՝ մերձեցնելու Լեռնային Ղարաբաղի շուրջ երկու կողմերի դիրքորոշումները»,- հայտարարել է փոխարտգործնախարարը:
Թե ինչո՞ւ է այս փուլում ռուսական կողմն ակտիվացնում հակամարտության լուծմանն ուղղված իր ջանքերը` «Առաջին լրատվական»-ը փորձեց պարզել մասնագետներից: Գլոբալիզացիայի և տարածաշրջանային համագործակցության վերլուծական կենտրոնի ղեկավար Ստեփան Գրիգորյանը «Առաջին լրատվական»-ի հետ զրույցում նշեց, որ դժվար է ասել, թե ամռան այս սեզոնին ինչո՞ւ է Ռուսաստանը նման հայտարարություններ անում: «Միգուցե դրանով Ռուսաստանը մեկ անգամ նորից հիշեցնում է, որ ինքը կա, ուշադիր հետևում է գործընթացին: Գաղտնիք չէ, որ Ղարաբաղի հարցով բանակցությունները ռեալ փակուղում են հայտնվել: Գործընթացը սառեցված վիճակում է, ու միգուցե նման հայտարարություն անելով՝ Ռուսաստանը ևս մեկ անգամ ուզում է ընդգծել իր դերը, իր պատրաստակամությունը և ակտիվ միջնորդի դեր կատարել»,- ասաց փորձագետը:
Նա հիշեցրեց, որ վերջին տարիների Ռուսաստանի դերակատարությունը բանակցային գործընթացում շատ ակտիվ էր, անգամ Ռուսաստանի նախագահի նախաձեռնությամբ ու ներկայությամբ հակամարտող կողմերի միջև մի քանի հանդիպումներ կայացան: Չնայած նրան, որ բանակցային գործընթացն այսօր սառեցված վիճակում է, ըստ Ստեփան Գրիգորյանի, Ռուսաստանն այնուամենայնիվ չի ցանկանում կորցնել իր կարևորագույն դերակատարությունն այս հարցում:
ԼՂՀ նախագահի մամուլի քարտուղար Դավիթ Բաբայանը կարծում է, որ ռուսական կողմի այս հայտարարությունը միտված է խաղաղության ու կայունության ամրապնդմանը: «Ադրբեջանի կողմից վարվող քաղաքականությունն ամբողջովին միտված է նրան, որպեսզի այդ խաղաղությունն ու կայունությունը ինչ-որ ձևով խախտվի: Ռուսաստանի նման հայտարարությունը պետք է դիտարկել այն տեսանկյունից, որ կպահպանվի այդ խաղաղությունն ու կայունությունը և անթույլատրելի է իրավիճակի որևէ սրում»,- ասաց Բաբայանը: Ըստ նրա՝ չի բացառվում, որ այդ հայտարարությունը որպես նախազգուշացում է՝ ուղղված ադրբեջանական կողմին: «Իմ կարծիքով` դա ուղղված էր նրան, որպեսզի Ադրբեջանն իրեն պահի այն շրջանակներում, որոնք ընդունելի են միջազգային դիտորդական ու միջնորդական առաքելություն իրականացնող պետությունների համար»,- ընդգծեց Բաբայանը:
