Իրանի բարձրաստիճան մի պաշտոնյա հայտարարել է, որ Իրանը արագորեն ցամաքող Ուրմիա լիճը վերակենդանացնելու գործում ստացել է Հայաստանի աջակցությունը: Այս մասին հաղորդում է Tehran Times-ը:
Ուրմիան աղի լիճ է` տեղակայված Իրանի հյուսիս-արևմուտքում: Այն ընկած է Արևելյան Ադրբեջան և Արևմտյան Ադրբեջան նահանգների միջև: Ուրմիան Իրանի ամենամեծ լիճն է և մոլորակի երրորդ աղի լիճը` 5.200 քառակուսի կմ մակերեսով:
Իրանի Շրջակա միջավայրի պահպանության կազմակերպության ղեկավար Մուհամեդ Ջավադ Մուհամեդզադեի խոսքով` Իրանն ու Հայաստանը համաձայնության են եկել Հայաստանից ջրափոխանցման հարցի շուրջ` կարգավորելու համար լճի ջրի մակարդակի ծայրահեղ անկումը: Շոգ եղանակը և տեղումների սակավությունը հանգեցրել են լճի` ռեկորդային ցածր մակարդակի: Նա հավելել է, որ լճի վերականգնման ծրագիրը ներառում է ջրափոխանցում` Արևելյան Իրանական Ադրբեջան շրջանից:
Նախկինում Իրանի իշխանությունները հայտարարել են Արաքս գետից ջրամատակարարման ծրագրի մասին, որն անցնում է Իրանի և Ադրբեջանի սահմանով: Սակայն Ադրբեջանի կողմից մերժում ստանալով` 950 միլիարդ թուման արժողությամբ ծրագիրը ձախողվել է:
Վերջին շրջանում Իրանն ու Հայաստանը համաձայնագիր են ստորագրել` բնապահպանական նախագծերի շուրջ համագործակցության վերաբերյալ:
Իրանական կողմը կարծում է, որ Ուրմիա լճի ցամաքումն ազգային բնապահպանական աղետ կլինի, որը կարող է ազդել նաև հարևան երկրների վրա:
Թեհրանը հաղորդում է, որ լճի կեսը` շուրջ 3000 քառակուսի կիլոմետր, չորացել է և վերածվել աղի դաշտերի:
Ջրի արագ գոլորշիացման և աղի պարունակության խտացման հետևանքով որոշ ջրիմուռներ լճի ջրերը կարմիրով են ներկել:
Բնապահպանները նախազգուշացնում են, որ արագ և վճռական քայլեր չձեռնարկելու դեպքում «աղի փոթորիկներ» կձևավորվեն ու նույնիսկ կհասնեն Թեհրան նահանգ:
