Երեկ կայացան Եվրոպայի լիգայի 1/16 եզրափակիչ 15 հանդիպումները, ևս մեկը կայացել էր փետրվարի 15-ին. «Մանչեսթր Սիթին» հյուրընկալվելիս գոլազուրկ ոչ-ոքի էր խաղացել հունական «Արիս»-ի հետ:
Հինգշաբթի օրվա մեկնարկային խաղում Կազանի «Ռուբին»-ը Մոսկվայում 0:2 հաշվով զիջեց հոլանդական «Տվենտե»-ին: Պարտություն կրեց նաև Ռուսաստանի չեմպիոն «Զենիտ»-ը: Սանկտ Պետերբուրգի թիմը հյուրընկալվելիս 2:1 հաշվով զիջեց շվեյցարական «Յանգ Բոյս»-ին: Մյուս երկու ռուսական ակումբները հաղթանակներ տոնեցին. Մոսկվայի «Սպարտակ»-ը մրցակցի հարկի տակ 2:3 հաշվով առավելության հասավ «Բազել»-ի նկատմամբ, իսկ «ԲԿՄԱ»-ն կրկին մրցակցի հարկի տակ նվազագույն հաշվով հաղթեց հունական «Պաոկ»-ին:
Ամենախոշոր հաշիվը գրանցվեց «Մետալիստ»-«Բայեր» խաղում. լևերկուզենցիները 4 անպատասխան գնդակ ուղարկեցին Խարկովի թիմի դարպասը և գործնականում լուծեցին հաջորդ փուլ դուրս գալու խնդիրը: Խոշոր հաշիվներ գրանցվեցին նաև «Բեշիքթաշ»-«Դինամո Կիև» և «Անդերլեխտ»-«Այաքս» հանդիպումներում: Երկու դեպքում էլ հաղթանակներ տարան հյուրերը: Ուկրաինացիները 1:4 հաշվով սենսացիոն պարտության մատնեցին իրենց հարկի տակ անպարտելի համարվող թուրքական ակումբին, «Այաքս»-ն էլ 0:3 հաշվով հեշտ հաղթանակ տարավ բելգիացիների նկատմամբ:
Մյուս հանդիպումներում գրանցվեցին հետևյալ արդյունքները` «Նապոլի»-«Վիլյառեալ»` 0:0, «Սևիլիա»-«Պորտու»` 1:2, «Բատե»-«ՊՍԺ»` 2:2, «Բենֆիկա»-«Շտուտգարտ»` 2:1, «Լեխ»-«Բրագա»` 1:0, «Լիլ»-«Էյնդհովեն»` 2:2, «Ռեյնջերս»-«Սպորտինգ»` 1:1, «Սպարտա»-«Լիվերպուլ»` 0:0:
