Русский репортер կայքը շարունակում է «վրացական դոսյեի» հրապարակումը և այս անգամ դրանք վերաբերում են ԱՄՆ-ից Վրաստանին սպառազինության մատակարարմանը ուկրաինական մի ընկերության միջնորդությամբ:
Փաստաթղթից պարզ է դառնում, որ ուկրաինական «Bel Trading» ընկերության հետ կնքված պայմանագրում զենքը չառաքելու դեպքում վրացական գումարների վերադարձի մասին կետ չկա,ինչը նշանակում է որ ուկրաինացիներն ուղղակի յուրացրել են գումարը` առանց զենքը Վրաստան հասցնելու: Վրացիները գումարը վերադարձնելու միակ տարբերակը բեռի անորակությունն ու նախնական չափանիշներին անհապատասխանությունը կարող էր լինել:
Վրաստանում ԱՄՆ դիվանագետների գաղտնի գրագրության մեջ նշվում է, որ Վրաստանի պաշտպանության նախարարությունը, չնայած ուկրաինական ընկերության հետ ունեցած բազմաթիվ պայմանագրերին, ցանկանում է խզել կապերը` առանց վրացական պետական գումարների կորստի:
Վրաստանի պաշտպանության փոխնախարար Օտար Բերձենիշվիլին գժգոհ է եղել ընկերության գործունեության ոչ թափանցիկ լինելուց: Բացի այդ, վրացական պաշտպանական գերատեսչությանը ուկրաինացիները խաբել են որոշ պայմանագրերի ստատուսի վերաբերյալ, իսկ որոշ դեպքերում ուղղակի հնարավոր չի եղել ուկրաինական կողմին փոխանցվող գումարների և նրանց կատարած աշխատանքի վերահսկումը: