ԱՄՆ պետքարտուղար Հիլարի Քլինթոնն այսօր ուղևորվում է Աֆրիկա` 10-օրյա շրջագայության, որի ընթացքում կընդգծի ժողովրդավարացման և տարածաշրջանի տնտեսական աճի անհրաժեշտությունը:
«Պետքարտուղարը առաջին կանգառը կանի Սենեգալում, որտեղ նա կհանդիպի նախագահ Մակի Սալեմի և մյուս առաջնորդների հետ: Նա իր ելույթում կանդրադառնա սենեգալյան ժողովրդավարական ինստիտուտների կայունության և համագործակցության հնարավորության հարցերին»,-ասված է ԱՄՆ պետդեպարտամենտի պաշտոնական ներկայացուցիչ Վիկտորյա Նուլանդի հաղորդագրության մեջ:
Այնուհետև Քլինթոնը կուղևորվի Հարավային Սուդան, որտեղ մտադիր է խթանել բանակցությունները Սուդանի հետ` կապված անվտանգության, նավթի արտահանման և այլ հարցերի հետ:
RIA Novosti-ի փոխանցմամբ` Ուգանդայում պետքարտուղարը կքննարկի տարածաշրջանային անվտանգությանը, Սոմիալիում տիրող իրավիճակին և ՁԻԱՀ-ի դեմ պայքարին առնչվող հարցեր:
Քենիայում պետքարտուղարի և երկրի ղեկավարների բանակցությունների գլխավոր թեման կլինի 2013-ին այնտեղ կայանալիք ազգային ընտրությունները: Մալավիում բանակցությունները կծավալվեն տնտեսական և քաղաքական բարեփոխումների հարցերի շուրջ:
«Հարավաֆրիկյան Հանրապետությունում ԱՄՆ պետքարտուղարը հարգանքի տուրք կմատուցի նախկին նախագահ Նելսոն Մանդելային և կմասնակցի ԱՄՆ-ՀԱՀ ռազմավարական երկխոսությանը, որի ուշադրության կենտրոնում կլինեն երկու կողմերին հուզող հարցերը, հանձնարարությունները` Աֆրիկայում և միջազգային ասպարեզում:
Պետքարտուղարին կուղեկցի ամերիկացի գործարարների պատվիրակությունը: Քլինթոնը Վաշինգտոն կվերադառնա օգոստոսի 10-ին:
