Գյումրիի քաղաքապետի պաշտոնի համար սեպտեմբերի 9-ին կայանալիք ընտրությանը Սամվել Բալասանյանի առաջադրումը բավական հետաքրքիր իրավիճակ ստեղծեց ներիշխանական հարաբերություններում: Ներկայումս իշխանական շրջանակներում շատերն են հարց տալիս՝ Սամվել Բալասանյանը ՀՀԿ-ի՞, թե՞ «Բարգավաճ Հայաստան»-ի թեկնածուն է:
Ֆորմալ տեսանկյունից նա, իհարկե, ԲՀԿ թեկնածուն է, բայց այդ թեկնածուն ստացել է Սերժ Սարգսյանի հավանությունը, կամ ավելի շուտ՝ ԲՀԿ-ն Սերժ Սարգսյանի հավանությանն արժանացած թեկնածուին է որոշել առաջադրել: Պատահական չէ, որ «Բարգավաճ Հայաստան»-ն առաջադրման իր որոշման մասին հայտարարեց այն բանից հետո, երբ մամուլում տեղեկություններ հայտնվեցին, որ Սամվել Բալասանյանը եղել է նախագահի նստավայրում և ստացել է Սերժ Սարգսյանի հավանությունը: Երբ Բալասանյանը դուրս է եկել նախագահի նստավայրից, մի քանի ժամ անց է միայն ԲՀԿ-ն հայտարարել, որ կառաջադրի Բալասանյանին: Իսկ նա էլ, ի վերջո, հաստատեց, որ հանդիպում ունեցել է Սերժ Սարգսյանի հետ: Այսպիսով` Սամվել Բալասանյանը ավելի շատ ՀՀԿ-ի, քան ԲՀԿ-ի դե ֆակտո թեկնածուն է:
Ավելին` կասկած չկա, որ Գյումրիի քաղաքապետի համար ԲՀԿ-ն ավելի ուժեղ թեկնածու ուներ՝ հանձին Մարտուն Գրիգորյանի: Գրիգորյանը Գյումրիում Վարդան Ղուկասյանի կլանի դեմ կանգնած ամենաուժեղ կլանի ներկայացուցիչն է, բնականաբար` նա ուներ հաղթելու ամենամեծ շանսերը: Ավելին` Գրիգորյանի պարագայում Վարդան Ղուկասյանն ու նրա որդին հազիվ թե անպատիժ կերպով օրեր շարունակ հոխորտային, ինչպես անում են Սամվել Բալասանյանի դեմ: Բայց Գրիգորյանը կլիներ ԲՀԿ թեկնածուն:
Այսպիսով` Բալասանյանի պարագայում Գյումրին դե յուրե «տալով» ԲՀԿ-ին` Սերժ Սարգսյանը դե ֆակտո պահում է իրեն: Սա լուրջ տարաձայնություններ կարող է առաջացնել «Բարգավաճ Հայաստան»-ի շարքերում, քանի որ մի կողմից` Մարտուն Գրիգորյանն ու նրա համախոհները կտարակուսեն, թե ինչու իրենք, իրականում լինելով ուժեղ և ըստ էության ապահովելով ԲՀԿ-ի խորհրդարանական հաջողությունները Շիրակում և Գյումրիում, պետք է հետին պլան մղվեն և չստանան Գյումրիի քաղաքապետարանը: Մյուս կողմից` «Բարգավաճ Հայաստան»-ում Սամվել Բալասանյանն արդեն շատ շրջանակներում կարող է ընկալվել որպես Սերժ Սարգսյանի մարդ, ով ներդրված է ԲՀԿ-ում: Թեև այն բանից հետո, երբ Բալասանյանը հայտարարեց, որ իր ճակատին ՕԵԿ է գրված և ամիսներ անց ուղղակի անցավ ԲՀԿ, պետք չէր պատրանք ունենալ, թե նա սկզբունքային բարգավաճական է: Սամվել Բալասանյանը սկզբունքային գարեջրագործ է, իսկ նման դեպքերում հարցը մեկն է՝ չհակառակվել իշխանությանը:
Բայց այստեղ հարցը միայն Բալասանյանի հանդեպ վերաբերմունքը չէ, քանի որ Գագիկ Ծառուկյանը փաստորեն սատարում է նրան, ինչը անուղղակիորեն նշանակում է, որ Ծառուկյանն էլ ինչ-որ առումով փայփայում է Սերժ Սարգսյանի ազդեցությունը ԲՀԿ-ում: Սակայն այստեղ էլ, հայաստանյան տարիների իրականության բարձունքից նայելով, ոչ մի զարմանալի բան չկա. ի վերջո` Գագիկ Ծառուկյանն էլ է գարեջրագործ և ունի շատ այլ բիզնեսներ, հետևաբար քաղաքականության մեջ նրա և Սամվել Բալասանյանի մոտեցումներն ու տրամաբանությունը առանձնապես չեն տարբերվի:
