Իրանական ILNA լրատվական գործակալության փոխանցմամբ՝ իրանական մի շարք թերթեր կարող են բախվել փակման խնդրին, ինչի պատճառը երկրում թղթի արժեքի բարձրացումն է: Այս տարի թղթի գինն Իրանում աճել է 80 տոկոսով: Այս մասին հայտարարել է «Աֆտաբ Եզդ» թերթի գլխավոր խմբագիր Մանսուր Մուզաֆֆարին:
Վերջինիս խոսքերով՝ թղթի գնի բարձրացման հետ մեկտեղ, գնորդներին իրենց պայմաններն են թելադրում նաև թղթի ներկրողներն ու միջնորդները: Դրա պատճառը դարձել է թղթի սուբսիդիաների վերացումը:
Մուզաֆարին ընդգծել է, որ այդպիսի պայմաններում «Աֆտաբ Եզդ» թերթի գործունեությունն անհնար է, քանի որ իրենք չեն ցանկանում ժողովրդին ճնշման տակ դնել՝ թանկարժեք թերթերի վաճառքով: Նա հավելել է, որ եթե իրավիճակը չփոխվի, ապա թերթի գործունեությունը կկասեցվի:
