«Սերժ Սարգսյանի արձակուրդ գնալը բավականին ծանր են ընդունել համայնքապետերը: Բանն այն է, որ սեպտեմբերին սպասվող ՏԻՄ ընտրություններից առաջ Սերժ Սարգսյանը կոնկրետ մարդկանց պետք է «դաբրո» տար քաղաքապետի պաշտոնում առաջադրվելու համար»,- գրում է «Հրապարակ»-ը և հավելում.
«Մեր տեղեկություններով` անորոշության մեջ է հայտնվել Վանաձորի քաղաքապետ Սամվել Դարբինյանը, ում թեկնածության պաշտպանությունը ՀՀԿ-ում հիսուն-հիսուն էր, և ինչ-որ առիթով Սամվել Դարբինյանը նեղսրտել է, որ Սերժ Սարգսյանն իր հարցը չի որոշակիացրել, ինչը վկայում է այլ թեկնածուի հավանական հայտնության մասին: Նշենք, որ երկարամյա քաղաքապետ Դարբինյանի կարիերայի ավարտի մասին խոսվում ամիսներ շարունակ, սակայն նրա մերձավորների շրջապատում խոսում էին, որ, միևնույն է, Դարբինյանին այլընտրանքային թեկնածու չի գտնվելու, ու վերջիվերջո կանգ կառնեն նրա վրա:
Ըստ որոշ լուրերի` Վարդան Ղուկասյանի շուրջ ծավալված դեպքերի ֆոնին Դարբինյանի անշառ կեցվածքը բարձրացրել է նրա «արժեթղթերը», և թերևս հենց նրա թեկնածության վրա է կանգնելու ՀՀԿ-ն:
Սակայն ավելի հավանական է, որ նախագահականից «դաբրոներ» չեն ստանա Ստեփանավանի և Գավառի քաղաքապետերը: Գավառի քաղաքապետը ԲՀԿ կազմում լուծարված Գուրգեն Արսենյանի Միավորված աշխատանքային կուսակցության ներկայացուցիչ Գուրգեն Մարտիրոսյանն է, ում անունը պարբերաբար շրջանառվում է տարբեր քրեական գործերով, ուստի նրանից եևս որոշել են ազատվել»:
