Մեծ Բրիտանիայում Amazon ինտերնետ խանութի պահեստի աշխատողները փորձում են հնարավորինս քիչ ընդմիջում անել աշխատանքի ընթացքում և շշեր են օգտագործում, որպեսզի կրճատեն զուգարան գնալու ժամանակը,– հաղորդում է Business Insider-ը։
Amazon-ի չորսհարկանի պահեստի մակերեսը ավելի քան 65 հազար քառակուսի մետր է, և զուգարան գնալու համար աշխատակիցները պետք է տաս րոպեանոց զբոսանքի դուրս գան դեպի առաջին հարկ։ Պահեստի աշխատակիցները վախենում են կորցնել իրենց աշխատանքը՝ ղեկավարության պատժամիջոցների պատճառով,– հաղորդել է համալիրի աշխատակիցը։ «Ցուցանիշները, որոնց պետք է հասնենք, կտրուկ աճել են։ Ես ջուր չեմ խմում աշխատանքի ընթացքում, քանի որ զուգարան գնալու ժամանակ չունեմ»,– նշել է նա։ Ընկերությունից սակայն հայտարարել են, որ աշխատակիցները ազատ կարող են զուգարան գնալ և, որ աշխատավայրում նրանց համար ստեղծված են բոլոր հարմարավետ պայմանները։
Amazon-ի սեփականատերը՝ Ջեֆ Բեզոսը, մոլորակի ամենահարուստ մարդն է՝ Bloomberg-ի վարկածով. նրա կարողությունը 120 միլիարդ դոլար է գնահատվում։
