Իրանի կառավարությունն ԱՄՆ դոլարի օգտագործման նոր սահմանափակումներ է դրել՝ արգելափակելով ամերիկյան արժույթի օգտագործման հնարավորությունը ներկրման գործողություններում: Այս մասին հայտնում է Trend-ը՝ հղում անելով իրանական ԶԼՄ-ներին:
Նշվում է, որ ապրանքների մատակարարման ցանկացած պատվեր կամ ներկրման այլ հայտարարագրեր, որոնցում ԱՄՆ դոլար կօգտագործվի, չեն մշակվի Իրանի մաքսային օրգանների կողմից:
Իրանի Արժութային գործողությունների կանոնների և Կենտրոնական բանկի քաղաքականության հարցերով դեպարտամենտի տնօրեն Մեհդի Կասրեյպուրի հայտարարությամբ՝ նոր կանոնները չպետք է մեծապես ազդեն ներկայիս առևտրային գործողությունների վրա՝ հաշվի առնելով, որ այդ գործընթացներում ԱՄՆ դոլարի օգտագործումն առանց այդ էլ սահմանափակ էր: Նրա խոսքով՝ ԱՄՆ պատժամիջոցների պատճառով տեղական բանկերն առանց այդ էլ չէին կարողանում դոլարով գործողություններ կատարել:
