Վրաստանի արտգործնախարար Միխայիլ Ջանելիձեն ուղևորվել է Բրյուսել՝ մասնակցելու «Վրաստան-ՆԱՏՕ» հանձնաժողովի աշխատանքին, որը դիտարկում է Թբիլիսիի կողմից իրականացվող բարեփոխումների ընթացքը և նորերի անցկացման նպատակահարմարությունը։ Այցի ծրագրում նախատեսված են նաև հանդիպումներ ՆԱՏՕ-ի գլխավոր քարտուղար Յենս Սթոլթենբերգի և նրա տեղակալների հետ։
Երեկ Heritage Foundation ամերիկյան ռազմավարական հետազոտական ինստիտուտը հրապարակել էր զեկույց, որում ասվում է, որ մասնավոր զրույցներում Վրաստանի պաշտոնատար անձիք չեն բացառում երկրի «փոխզիջումային անդամակցությունը» ՆԱՏՕ-ին, որը ենթադրում է «ժամանակավոր հրաժարում» Աբխազիայից և Հարավային Օսիայից։
«Վրաստանի անդամացությունը ՆԱՏՕ-ին բխում է ԱՄՆ-ի և Եվրոպայի շահերից» անվանումով զեկույցում ասվում է, որ ՆԱՏՕ-ի կանոնադրության 5-րդ հոդվածը, որը նախատեսում է հավաքական պաշտպանություն և անվտանգության երաշխիքիներ, ժամանակավորրապես չի տարածվի Ռուսաստանի օկուպացրած տարածքների վրա, քանի դեռ այդ հարցը չի լուծվել Ռուսաստանի հետ խաղաղ բանակցությունների ուղիով։ Զեկույցում հիշեցվում է նաև 1952 թվականի փետրվարի «փոխզիջման» նախադեպի մասին, երբ դաշինք են ընդունվել միմյանց հանդեպ տարածքային հավակնությունները չկարգավորած Հունաստանն ու Թուրքիան։
Զեկույցում նշվում է, որ ՆԱՏՕ-ին Վրաստանի անդամակցության ձգձգումը կապված է տարածքային խնդիրների չկարգավորված լինելու հետ։ Դա վախեցնում է Հյուսիսատլանտյան դաշինքի որոշ անդամների։ Նրանք մտավախություն ունեն, որ ռազմաքաղաքական բլոկում Վրաստանի ընդունումն էականորեն կմեծացնի Ռուսաստանի հետ ռազմական ընդհարման ռիսկերը։