Մսի գնի կտրուկ թանկացումը Հայաստանի ագրարագյուղացիական միավորման նախագահ Հրաչ Բերբերյանի համոզմամբ՝ պայմանավորված է անասնակերի գնի թանկացմամբ։ Նրա խոսքերով՝ 1 հակ խոտի արժեքը բարձրացել է 4-5 անգամ , իսկ անասնակերի գնի թանկացումը, բնականաբար, ազդելու էր և կաթի և մսի արտադրության գնի վրա։ Ըստ բանախոսի, անկախ այս օբյեկտիվ պատճառից՝ մսեղենի շուկայում շեշտակի գնաճն արդարացված չէ։
«Հիմա Նոր տարուց հետո մի փոքր կընկնի գները, որովհետև շուկան հագեցած է, փետրվարին գները մի քիչ կպակասեն, մարտ-ապրիլ ամիսներին կրկին կավելանան, բայց մայիսից արդեն հենց կանաչ արոտները բացվեն անասուններին կրկին կտանեն արոտ ու անասնակերի կարիք այլևս չի լինի, բայց, իհարկե, եթե ժամանակին խոտը քաղվեր, չթողնեին որ հրդեհներն արգելանոցներում, լեռնային, նախալեռնային գոտիներում այդքան վնաս տար անտառներին, չթողեին այդ խոտը չորանար, գյուղացիներին ժամանակին հայտարարվեր երաշտի մասին, ապա այսօր այս վիճակը չէինք ունենա»,- «Առաջին լրատվական»-ի հետ զրույցում նշեց Հրաչ Բերբերյանը։
Վերջինս չի բացառում, որ նախատոնական այս օրերին հնարավոր է նաև, որ հիվանդ անասունի միս կփորձեն վաճառել։
«Մի քանի օր առաջ ես ՍԱՊԾ-ում այդ հարցը բարձրացրել եմ, որ Աստված չանի, փորձեն հանկարծ վարակված անասունի միս ծախեն ժողովրդի վրա․ դա թաքցնելու բան չի, հասարակությունը դրա մասին կիմանա, բայց կարծում եմ, որ այս տոնական օրերին այդ հարցի նկատմամբ ՍԱՊԾ-ում էլ են աչալուրջ և նման հարված չեն տա ազգաբնակչությանը»,-հավելեց նա։
Մանրամասները՝ տեսանյութում։
Լուսանկարը՝ armeniasputnik.am-ի