Wikipedia-ի հիմնադիր Ջիմմի Ուեյլսը շուտով փորձնական ռեժիմում կգործարկի առցանց ծառայություն Wikitribune-ը՝ ուղղված ԶԼՄ-ներում անարժանահավատ տեղեկատվության տարածման դեմ պայքարին։ Այս մասին գործարարը հայտնել է Նյու Յորքում Global Synergy Forum-ի ժամանակ։ «Մենք փակ բետա-թեստավորման փուլում ենք»,-ասել է Ուեյլսը։
Ձեռնարկատերն ընդգծել է, որ ցանկանում է իրականացնել ռեսուրսի գործարկումն առանց ավելորդ աղմուկի, որպեսզի կայքի հանդեպ օգտատերերի մեծ թվի միաժամանակյա ուշադրությունը չխաթարի Wikitribune-ի աշխատանքը։ Ծրագրվում է, որ ռեսուրսի ֆինանսավորումը կիրականացվի կամավոր նվիրատվությունների հաշվին։ Ուեյլսի խոսքով՝ նախագիծը կապված չէ Wikipedia-ի և Wikimedia հիմնադրամի հետ։
Գործարարը հայտնել է, որ կայքում կզետեղվեն իսկության մանրակրկիտ ստուգում անցած լրատվական նյութեր՝ ակտուալ թեմաներով։ Նյութերի՝ հրապարակման նախապատրաստելու համար պատասխանատվություն կկրի խմբագիրների ու լրագրողների խումբը։ Նորությունները խմբագրել կարող են բոլոր ցանկացողները, սակայն տեղեկությունը կհրապարակվի ռեսուրսի աշխատակիցների կողմից ստուգվելուց հետո միայն։