Առողջապահության նախկին նախարար Արարատ Մկրտչյանի կարծիքով՝ կառավարության գործունեությունից ոչ շոշափելի, ոչ էլ նվազ դրական փոփոխություններ քաղաքացին չի զգում:
«Մեկ տարին շատ քիչ, բայց մյուս կողմից կառավարությունը կարող էր ոչ ստանդարտ քայլեր կատարել, որոնք նաև իր ծրագրում էր ամրագրել, որպեսզի թե՛ տնտեսական, թե՛ սոցիալական ոլորտում քաղաքացին արդյունքը զգար, սակայն, դժբախտաբար այդպես չէ: Ինչ վերաբերում է վիճակագրությանը, ապա հետաքրքիր արտահայտություն կա՝ «թուղթն ամեն ինչին դիմանում է», ինչ ասես՝ կարելի է գրել, գծապատկերներ ներկայացնել՝ powerpoint-ներ անել, բայց թվերի հետևում կանգնած է մարդը, որն իր վրա ոչինչ չի զգում, կարող եմ ասել՝ նույնիսկ բացասական երևույթների տենդենցները էլ ավելի են ընթանում մեր երկրում, և արմատներն ավելի խոր են մտնում: Կարող եք փողոցում քայլել և տեսնել՝ ամեն ինչ հանձնվում է կամ վաճառվում է, անշարժ գույքի շուկան ահավոր վիճակում է»,- շեշտեց նա:
Անդրադառնալով ներդրումային միջավայրին և կառավարության կողմից խոստացված ներդրումներին՝ Արարատ Մկրտչյանն ասաց. «Ծանր սոցիալական, բարոյահոգեբանական, ճգնաժամային իրավիճակներում հասարակության մեջ գրբացների, բախտագուշակների, պոպուլիստական հայտարարությունների չափաբաժինը շատ մեծանում է: 90-ականների սկզբին էլ ասում էին, որ «Ջերմուկը», «Նաիրիտը» մեզ կպահեն, չպահեցին: 99-ին Արմենիկումը ի հայտ եկավ, ասացին՝ երկրի տնտեսությանը մեծ զարկ կտա, չօգնեց: Մեզ հիմա ասում են, որ նավթ ենք գտնելու, մեծահարուստ Սամվել Կարապետյանը շատ հետաքրքրված է, ասում են՝ խավիար արտադրող երկիր ենք դառնալու, ամբողջ աշխարհը խավիարով ենք ողողելու: Դրանք բարեհաճո, ականջահաճո հայտարարություններ են, դրանց շարքին է պատկանում նաև ներդրումների ակումբների ստեղծումը, որը հիմնադրամի տեսք պիտի ունենար»,- շեշտեց նա:
Մանրամասները՝ տեսանյութում:
