Ադրբեջանի ԱԳՆ-ը Կանադայի խորհրդարանի անդամ Թոնի Կլեմանի ազգանունը կներառի «սև ցուցակում»։ ԱԳՆ պաշտոնական ներկայացուցիչ Հիկմեթ Հաջիևի խոսքով՝ Թոնի Կլեմանը կներառվի Ադրբեջանի ԱԳՆ-ի անցանկալի անձանց ցուցակում՝ ԼՂ անօրինական այցի համար։
Նա նաև հայտնել է, որ Ադրբեջանի անհանգստությունն ու դժգոհությունը հասցվել են Կանադայի ԱԳՆ-ին և խորհրդարանին։
«Հուսով ենք, որ Կանադայի խորհրդարանի էթիկայի հանձնաժողովը կհետաքննի Կլեմանի գործունեությունը երկրի սահմաններից դուրս»,-նշել է Հաջիևը։
Օգոստոսի 30-ին Կանադայի խորհրդարանական պատվիրակությունը՝ «Միացյալ ազատ աշխարհ» կազմակերպության ղեկավար Մաջիդ Էլ Շաֆիի գլխավորությամբ այցելել էր Արցախ՝ 2016 թվականի ապիլին Ադրբեջանի զինված ուժերի ռազմական հանցագործությունների վերաբերյալ փաստեր հավաքելու նպատակով։
