Ավստրալիայում հայր ու որդի լքված կղզում մի քանի օր են անցկացրել և ողջ են մնացել Բեար Գրիլսի «Փրկվել ամեն գնով» ծրագրի շնորհիվ: Այս մասին հայտնում է The Independent-ը:
Ջոն Վորդը և նրա 13-ամյա տղան՝ Սթիվենը, մոլորվել են Ավստրալիայի հարավային Թասմանիա նահանգում շրջագայության ժամանակ: Որոնման համար փրկարարական ջոկատներ են մեկնել, որոնք նրանց հետքը գտել են անհետանալուց միայն 3 օր անց:
Որոնողական ջոկատի ղեկավար Մայքլ Փրեշոուի խոսքով՝ հենց փայտերով և ձարխոտի տերևներով հուսալի ապաստանի շնորհիվ է զբոսաշրջիկներին հաջողվել խուսափել սառելուց: Նրա խոսքով՝ ապաստանը պատրաստվել է Գրիլսի խորհուրդների համաձայն: