SUT.am-ը հրապարակել է ցուցակ և ձայնագրություններ, որոնցում 84 դպրոցների և 30 մանկապարտեզների տնօրեններ պատմում են, թե ինչպես են ցուցակագրել մարդկանց և ուր են ներկայացրել այդ ցուցակները:
«Ելք» դաշինքը պահանջում է ԿԸՀ-ից վարույթ հարուցել՝ ՀՀԿ-ի համար վարչական ռեսուրսի չարաշահման փաստով: Այս բացահայտման կապակցությամբ «Ելք» դաշինքն այսօր հրավիրել է ասուլիս եւ կոչ արել, որ ԿԸՀ–ն վարույթ հարուցի եւ արձանագրի այս խախտումը։
«Ելք»դաշինքի պատգամավորության թեկնածու Ալեն Սիմոնյանը նշեց, որ այս ձայնագրություններում կոնկրետ ՀՀԿ-ականների անուններ են տրվում՝ Արտակ Սարգսյան, Սեյրան Սարոյան, Միհրան Պողոսյան…
«Նրանց գրանցումը պիտի ԿԸՀ-ի կողմից անվավեր ճանաչվի: ՀՀԿ-ի գրանցումը պետք է ևս անվավեր ճանաչել: Իսկ նշված տնօրենները պետք է ժամանակավորապես լքեն իրենց պաշտոնները»,- ասաց Ա. Սիմոնյանը:
«Ազատ ընտրությունների սկզբունքը խախտված է, տեղի է ունեցել միջամտություն քաղաքացիների ազատ կամքի ձեւավորման նկատմամբ, նաեւ օգտագործվել է վարչական ռեսուրսը, հանրային ռեսուրսը մի որոշակի քաղաքական ուժի օգտին, տվյալ դեպքում ընտրական իրավունքի պաշտպանության գործառույթ իրականացնելու պարտականություն ունեցող Կենտրոնական ընտրական հանձնաժողովը պարտավոր է հարուցել վարույթ եւ անմիջապես արձագանքել այս խախտմանը։ Մի քանի հարյուր հաստատություններ, որոնք գտնվում են կամ պետական, կամ համայնքային ենթակայության տակ, ներգրավված են պրոցեսում, որը ընդգրկում է ՀՀ ողջ տարածքը»,–ասաց «Ելք» դաշինքի անդամ, իրավապաշտպան Արտակ Զեյնալյանը։
Մանրամասները՝ տեսանյութում:
