«Պաշտպանության նախարարը այս տեսակ հարցեր առաջ քաշելով ցանկանում է ինքնահաստատվել իր կարգավիճակում: Սրանք այն խնդիրները չեն, որոնցով նախարարը պետք է հետարքրվեր և կարծեր, թե մեծ խնդիրներ է լուծում բանակի համար: Բանակում առկա են ավելի լուրջ խնդիրներ,- այս մասին «Առաջին լրատվական»– ի հետ զրույցում ասաց իրավապաշտպան Ժաննա Ալեքսանյանը՝ անդրադառնալով պաշտպանության նախարար Վիգեն Սարգսյանի՝ կառավարության հերթական նիստում ներկայացրած նախագծին, որով նախատեսվում է խաղաղ ժամանակ զինծառայողների պարենային ապահովման չափաքանակներում հանել ծխախոտի հատկացումը:
«Նախարարը չպետք է որոշի զինվորի փոխարեն՝ զինվորը ծխի՞, թե՞ չծխի»,- ընդգծեց իրավապաշտպանը: Վ. Սարգսյանը պարզաբանել էր, որ առաջարկել են նույն գումարը, որը ծախսվում է ծխախոտի վրա, ավելացնել հավելավճարներին, որպեսզի նրանք, ովքեր չեն ծխում, չխրախուսվեն ծխելու, իսկ նրանք ովքեր ծխում են, կարողանան ընտրել իրենց նախընտրած ծխախոտը: Ժաննա Ալեքսանյանի դիտարկմամբ՝ այս հիմնավորումները նախարարն ինքն իր համար է արել. «Ինքն իրեն է համոզում, ոչ թե հանրությանը: Հանրությունը չի վստահում նախարարին, մտավախություններ կան, որ այդ գումարը չի հասնի զինծառայողներին: «1000 դրամների» նախաձեռնության ֆոնին նախարարը խորացնում է անվստահությունն իր նկատմամբ»:
Իրավապաշտպանի խոսքով՝ այս տարի արդեն 12 զինվոր է զոհվել, որոնցից 7-ը կամ 8-ը միջանձնային հարաբերությունների արդյունքում է զոհվել: «Եվ մենք նախարարի ձայնը չենք լսում՝ ո՛չ ցավակցություն, ո՛չ ափսոսանք»,- մտահոգություն արտահայտեց իրավապաշտպանը և հարց բարձրացրեց. «Ի՞նչ կանխարգելիչ գործողությունների է դիմել նախարարը, որպեսզի այդքան զինվոր չզոհվի»:
Մանրամասները՝ տեսանյութում:
