Վերջին շրջանում ՔԿՀ աշխատակիցների կողմից փաստաբանները աննախադեպ խուզարկությունների են ենթարկվել. Ժիրայր Սէֆիլյանի փաստաբան Մուշեղ Շուշանյանը խուզարկության է ենթարկվել, երբ նա պետք է այցելեր իր վստահորդին, մի քանի օր առաջ փաստաբան Երվանդ Վարոսյանն է խուզարկվել ՔԿՀ-ում, բազմաթիվ այլ փաստաբաններ ևս բարձրաձայնում են այս մասին:
Թեմայի շուրջ «Առաջին լրատվական»- ի հետ զրույցում անդրադառնալով հարցերին՝ ի՞նչ իրավական կարգավորումներ կան, արդյո՞ք սա կարելի է դիտարկել օրինականության դաշտում, փաստաբան Գևորգ Գյոզալյանը նշեց, որ իրավակարգավորումներ կան Սահմանադրությամբ՝ լայն իրավունք է տրված և իրավաբանական օգնությունը երաշխավորվում է, այսինքն՝ յուրաքանչյուրն ունի իրավաբանական օգնություն ստանալու իրավունք, որի մեջ ներառվում է որակյալ փաստաբանական օգնությունը:
«Այս առումով փաստաբան-վստահորդ հարաբերությունները ամբողջությամբ տեղավորվում են փաստաբանական գաղտնիքի տակ»,- նշեց Գևորգ Գյոզալյանը՝ հավելելով, որ Փաստաբանության մասին օրենքով սահմանվում է, թե որոնք են համարվում փաստաբանական գաղտնիք:
Նրա խոսքով՝ փաստաբանական գաղտնիք հանդիսացող տեղեկատվությունը երրորդ անձանց հայտնի դարձնելու հանգամանքը բերելու է փաստաբանական գաղտնիքի խախտման:
Գյոզալյանի դիտարկմամբ՝ փաստաբանների խուզարկության հետ կապված լրջագույն խնդիր կա. «Օրինակ՝ Մ. Շուշանյանի փաստաթղթերն են փորձել ստուգել, երբ որ նա փորձել է Ժիրայր Սէֆիլյանին այցելել, փաստաբանը գնում է իր աշխատանքը կատարելու, մարտավարություն գծելու, նախաքննության փուլում է որոշվում դատավարական մարտավարությունը, որի մասին կարող է նշվել փաստաթղթերում, այստեղ միանշանակ փաստաբանական գաղտնիքի միջամտություն կա»:
Մանրամասները՝ տեսանյութում: