«Ելք» դաշինքի առաջնորդների հետ այսօր կայացած նախընտրական հանրային հանդիպման ժամանակ դաշինքի անդամներն անդրադարձան երկրի տնտեսության առկա խնդիրներին և դիտարկմանը, որ 2016-ին ներդրումներ գրեթե չեն եղել:
Էդմոն Մարուքյանի խոսքով՝ տարիներ շարունակ իշխանությունների պնդումները, թե մեր տնտեսության վիճակը լավ չէ, քանի որ Թուրքիան սահմանը փակել է, մենք չունենք ծով, նավթ կամ, որ կիսապատերազմական վիճակում ենք՝ «Ելք» դաշինքը չի ընդունում: «Մենք պետք է կարողանանք առաջին հերթին փոխել ստատուս քվոն և պահովել այն չափորոշիչները, որոնք անհրաժեշտ են տնտեսության զարգացման համար»,- նշեց Մարուքյանը::
Նիկոլ Փաշինյանը հարց հնչեցրեց՝ ինչպե՞ս է պատահել, որ մարդը, ով 90-92թթ-ից ՀՀ-ում զբաղեցրել է պետական պաշտոններ, դարձել է, օրինակ, Մոցարտ գործարանի կա՛մ փայատեր, կա՛մ սեփականատեր… «Երբ որ այդ հարցի պատասխանը գտնենք, Հայաստանը կդառնա ներդրումների համար չափազանց բարենպաստ երկիր: Ինչպե՞ս է լինում, որ օֆշորային գոտում աստղաբաշխական գումարներ ունեցող մեկի հարցով գործ է հարուցվում, իսկ հետո կարճվում: Կամ ինչպես է լինում, որ բանան ներկրող մարդուն սպառնում են: Նման պայմաններում ի՞նչ ներդրման կամ ներկրման մասին կարող է խոսք լինել»: Փաշինյանը երաշխավորում է, որ 47 րոպեն նույնիսկ շատ է բանանի մենաշնորհը Հայաստանում վերացնելու համար:
«Մեր ասելիքն այն է, որ Հայաստանի կառավարությունն իր տնտեսությանը չի տիրապետում: Ռուսաստանում լավ կլինի, մեզ մոտ էլ լավ կլինի… Մենք տնտեսություն չունենք… Մենք պետք է խոսենք ոչ թե տնտեսություն զարգացնելու, այլ հիմնադրելու մասին»,- նշեց Նիկոլ Փաշինյանը: -Թուրքիայից չստեր բերելը ու նախկին գործարանի տարածքում բացված տոնավաճառում վաճառելը՝ տնտեսություն չի, դա տնտեսության բացակայություն է»,- նշեց Ն. Փաշինյանը՝ հավելելով, որ Հայաստանում պետք է լինի արտադրություն:
Մանրամասները՝ տեսանյութում: