Apple ամերիկյան կորպորացիան աշխատանքներ է տանում հավելյալ իրականության ակնոցների ստեղծման վրա։ Այս մասին հայտնում է Bloomberg գործակալությունը։
Հաղորդվում է, որ նախագիծը գտնվում է ամենավաղ փուլում, ներկա պահին ընկերությունը համապատասխան թեստեր է անցկացնում։ Գործակալության տվյալներով՝ եթե ընկերության ղեկավարությունը նախագծին տա «կանաչ լույս» և որոշի զանգվածային արտադրություն սկսել, ապա առաջին ակնոցները կարող են պաշտոնապես ներկայացվել 2018 թվականից ոչ շուտ։
Սպասվում է, որ սարքերը, որոնք կունենան հատուկ դիսփլեյները, անլար կմիանան iPhone սմարթֆոնին։ Ինչպես հիշեցնում է գործակալությունը, կորպորացիան հայտնի է նրանով, որ հաճախ է չեղարկում իր մշակումները։
