Ադրբեջանական Turan լրատվական գործակալության փոխանցմամբ՝ Բաքվի՝ ծանր հանցանքները քննող դատարանը երեքշաբթի երեկոյան հրապարակել է NİDA շարժման ակտիվիստ Գիյաս Իբրահիմովի դատավճիռը։
Իբրահիմովը մեղավոր է ճանաչվել խոշոր չափի թմրանյութերի ապօրինի շրջանառության համար և դատապարտվել է 10 տարվա ազատազրկման։ Ուշագրավ է, որ դատավորը որոշել է ավելի ծանր պատժաժամկետ սահմանել ակտիվիստի համար, քանի որ դատախազն Իբրահիմովի համար պահանջել էր 9 տարվա ազատազրկում։
Գիյաս Իբրահիմովն ու Բայրամ Մամեդովը կալանավորվել էին մայիսի 10-ին՝ թմրանյութերի ապօրինի շրջանառության մեղադրանքով։ Սակայն նրանք հայտարարել էին, որ իրենց կալանավորման պատճառն այն է, որ Հեյդար Ալիևի հուշարձանի պատվանդանին թողել են «Շնորհավորում ենք ստրուկների տոնի կապակցությամբ» և «Կորչի համակարգը» գրություններ։
Amnesty International միջազգային իրավապաշտպան կազմակերպությունը նրանց ճանաչել է որպես «խղճի բանտարկյալներ»։