Բուլղարիայի խորհրդարանը հավանություն է տվել օրինագծին, որն արգելում է հասարակական վայրերում կրել դեմքը փակող հագուստ։ Նիկաբի և փարաջայի արգելքի խախտման համար նախատեսված է մոտ 100 դոլարի տուգանք։ Այս մասին հայտնում է BBC-ն։
Կրկնակի խախտման դեպքում տուգանքի չափը կմեծացվի։ Առավելագույն չափը սահմանված է մոտ 800 դոլար։
Համաձայն օրենքի՝ հասարակական վայրերում արգելվում է կրել ցանկացած հագուստ, որը մասամբ կամ ամբողջովին փակում է դեմքը։
Քննարկման ընթացքում «Շարժում հանուն իրավունքների և ազատությունների» կուսակցությունը, որը ներկայացնում է երկրում թուրք հասարակության շահերը, քննադատել է օրինագիծը՝ որպես կրոնական ատելություն բորբոքելու փորձ։
Թուրքերը կազմում են Բուլղարիայի բնակչության մոտ 13 տոկոսը, նրանք ամենամեծ մուսուլմանական համայնքն են։
Բուլղարիայում թուրք կանայք, որպես կանոն, չեն ծածկում իրենց դեմքը, սակայն դա ընդունված է մյուս մուսուլման կանանց շրջանում։
