ԱՄՆ նախագահ Բարաք Օբաման և Գերմանիայի կանցլեր Անգելա Մերկելը սեպտեմբերի 29-ին տեղի ունեցած հեռախոսազրույցի ժամանակ հանգել են այն կարծիքին, որ Սիրիայում իրավիճակի նորմալացման պատասխանատվությունը պետք է կրեն սիրիական իշխանություններն ու Ռուսաստանը՝ հայտնում է Սպիտակ տան մամլո ծառայությունը։
«Նրանք ընդհանուր տեսակետ են հայտնել, որ Ռուսաստանն ու սիրիական ռեժիմը կրում են առանձնահատուկ պատասխանատվություն Սիրիայում կրակի դադարեցման և դեպի պաշարված ու դժվարհասանելի շրջաններ ՄԱԿ-ի մարդասիրական օգնության հասանելիության կազմակերպման գործում»,- ասվում է հաղորդագրությունում։
Բացի դրանից՝ Օբաման ու Մերկելը կոչ են արել սիրիական իշխանություններին ու Ռուսաստանին՝ դադարեցնել ռազմական գործողությունը Հալեպում։
Ավելի վաղ ԱՄՆ-ը Ռուսաստանին ու Սիրիայի իշխանություններին սպառնացել էր հետևանքներով՝ խաղաղ պլանի ձախողման դեպքում։
