Այսօր առավոտից «Դատապարտյալների հիվանդանոց» ՔԿՀ-ում իրարանցում է։ Քրեակատարողական վարչության աշխատակիցները աշխատանքային օրվա սկսելուն պես՝ այցելել են հիմնարկ ու սկսել առանց պատճառի դուրս գրել դատապարտյալներին ու հետ ուղարկել քրեակատարողական հիմնարկներ։ Ընդ որում, դուրս են գրում նաև այնպիսի դատապարտյալների, որոնք նոր են վիրահատվել, արյունահոսում են կամ սպասում են վիրահատման իրենց հերթին։
«Կամիսիան առավոտից սաղին դուրս է գրում։ Ով արյունաքամ է լինում, ով շլանգներով է՝ սաղին դուրս են գրում։ Թղթերը նայում են, տեսնում են, որ վիրահատության տակ է, էլի դուրս են գրում։ Հերիք չի՝ սաղ վիրահատությունները մեր միջոցներով են արվում, վարկերը վերցնում՝ տալիս ենք, վիրահատում են, իրենք էլ պետպատվերով փողերը դուրս են գրում՝ ուտում են»,- «Առաջին լրատվական»-ի հետ զրույցում ասաց դատապարտյալներից մեկի հարազատը։
Նա նշեց, որ այնպիսի իրարանցում է, որ շատ դեպքերում չեն էլ նայում դատապարտյալների բժշկական պատմությունը ու նրանց պարզապս տեղեկացնում են, որ իրենք դուրս են գրվել «Դատապարտյալների հիվանդանոցից» ու պետք է վերադառնան իրենց ՔԿՀ։
«Այսօր դուրս են գրել անգամ աղիքային պոլիպով, սուր ցավերի մեջ մի դատապարտյալի։ Դուրս են գրել նաև վաղը ժամը 3-ին թութքի վիրահատության պատրաստվող դատապարտյալին»,- ասաց դատապարտյալի հարազատը։
Ստեղծված վիճակի պատճառը, ըստ մեր զրուցակցի, այն է, որ այդպիսով փորձ է արվում «Դատապարտյալների» հիվանդանոցում առկա հիվանդների թիվը նվազեցնել, հիվանդների քանակը ցույց չտալ։ «Քանի որ սաղ գաղութները լցված են հիվանդներով, սաղին բերում լցնում են հիվանդանոց, ասում են՝ պետպատվեր չկա, ձեր հաշվին պետք ա վիրահատվեք։ Մենք էլ մտնում նք տոկոսով փողի տակ, փողը տալիս ենք՝ վիրահատում են, ու մի բան էլ հիմա մարդկանց այս վիճակով դուրս են գրում»։
Ստեղծված վիճակի պատճառով այսօր դատապարտյալներից մեկն անգամ կարել է աչքերը՝ ի նշան բողոքի։ Նա լուրջ հիվանդ է, սակայն նրան էլ են դուրս գրել և հետ են ուղարկում ՔԿՀ։
Դատապարտյալներն այսօր այս խնդրի հետ կապված ահազանգել են Օմբուդսմենի գրասենյակ և ակնկալում են, որ գոնե այդ հիմնարկից պատշաճ աջակցություն կստանան։