Կրեմլի մամուլի ծառայությունը տեղեկացնում է, որ ռուսական կողմի նախաձեռնությամբ տեղի է ունեցել Պուտին-Օբամա հեռախոսազրույց: Ըստ հաղորդագրության՝ կողմերը քննարկել են Սիրիայի, Ուկրաինայի իրավիճակը, ինչպես նաև խոսել են ղարաբաղյան խնդրով Սանկտ Պետերբուրգում եռակողմ հանդիպման արդյունքների մասին: Ըստ հաղորդագրության՝ Օբաման բարձր է գնահատել Ռուսաստանի ջանքերն այդ ուղղությամբ՝ աշխատանքը Մինսկի խմբի շրջանակներում:
«Երկու նախագահների հեռախոսազրույցը խոսում է միայն դրական տեղաշարժի մասին,-«Առաջին լրատվական»- ի հետ զրույցում ասաց ՀՀԿ խմբակցության ղեկավար Վահրամ Բաղդասարյանը,- այս տարիների ընթացքում սա լավագույն տարբերակն է, որ Մինսկի խմբի համանախագահները և գերտերություններն արդեն համակարծիք են, որ Մինսկի խմբի շրջանակներում՝ խաղաղ բանակցային ճանապարհով ԼՂ հակամարտության խնդիրը կարգավորվի»:
Անդրադառնալով հարցին, թե ինչ կարելիէ ակնկալել առաջիկայում Փարիզում կայանալիք նախագահների հանդիպումից՝ Վահրամ Բաղդասարյանը նշեց, որ շտապել պետք չէ, անպտուղ հանդիպում չի լինում, կան տեղաշարժեր. «Եթե դուք մտածում եք, որ Ֆրանսիայի հանդիպումից հետո վերջակետ կդրվի և այս խնդիրը կլծուվի, կարող եմ ասել, որ նման բան չի լինի, այս գործընթացը դանդաղ և դեռ բավականին երկար պիտի շարունակվի»:
Վ. Բաղդասարյանը հույս հայտնեց, որ հանրության, միջազգային ատյանների և Մինսկի խմբի համանախագահների ջանքերով այս հանդիպումները կվերածվեն բանակցությունների:
Նա նաև նշեց. «Մենք հավատարիմ ենք մնացել մեր սկզբունքներին, 94-95 թթ պայմանագրին և ձգտում ենք, որ այդ շրջանակներում լուծվի ԼՂՀ խնդիրը: Ռազմատենչ հայտարարություններ չենք անում, կողմնակից ենք խաղաղությանը, բայց խնդրի արդարամիտ լուծման պայմաններում»:
Մանրամասները՝ տեսանյութում: