«#ElectricYerevan»-ի ֆենոմենը՝ որպես քաղաքական, հասարակական, քաղաքացիական պայքարի գործընթաց, հանրային ընդվզման նոր դրսևորում». Բաղրամյան պողոտայում ծավալված իրադարձություններից մեկ տարի անց քննարկման առարկան քաղած դասերն են: «Էլեկտրիկ Երևանը» սոցիալակա՞ն, թե՞ քաղաքական պայքար էր՝ հարցն այսօր էլ է արդիական:
«Ոչ թալանին» նախաձեռնության անդամ Մաքսիմ Սարգսյանը կարծում է, որ բողոքը սոցիալական էր, բայց բխում էր քաղաքական անձանց սխալներից:
Հրապարակախոս Զառա Հովհաննիսյանի կարծիքով՝ խնդիրը սոցիալական էր, բայց քաղաքականացվեց, իսկ քաղաքականացնողն իշխանությունն էր, քանի որ լեգիտիմությամբ և արժանապատվությամբ չէր կարողանում լուծել Ռուսաստանի հետ կուտակված հարցերը:
«Էլեկտրիկ Երևանը» քաղաքական պայքար է համարում նաև Կովկասի ինստիտուտի տնօրեն Ալեքսանդր Իսկանդարյանը: Քաղաքագետը կարծում է, որ բողոքը սոցիալական այն խմբերի պայքարն էր, որոնք ունակ են արտահայտելու հասարակության դժգոհությունը: Ու քանի որ այս կամ այն խնդիրների վերաբերյալ հասարակության դժգոհությունը դեռ չի մարել, այսպիսի բողոքներ էլի կլինեն: Քաղաքագետը «Էլեկտրիկ Երևանը» համարում է նոր սերնդի ձեռքբերումը. «Շատ ցուցադրական էր, որ այնտեղ եկան քաղաքական գործիչներ, և նույնիսկ ոչ թե Աշոտյանը, այլ ընդդիմադիրներ: Նրանք ասացին՝ եկեք մենք ձեզ առաջնորդենք, իսկ երիտասարդներն ասացին՝ գնացեք գրողի ծոցը, որովհետև եթե դուք մեզ առաջնորդեք, մենք ոչ թե կավելանանք, այլ կպակասենք»:
Եթե էլեկտրաէներգիայի թանկացման խնդիրը բարձրաձայներ որևէ կուսակցություն, պայքարն այսքան ընդգրկուն չէր լինի: Հայաստանում կուսակցական ուժերի հանդեպ չկա վստահություն:
Դեռ 2014 թավականից «Ոչ թալանին» նախաձեռնությունը բոլոր կուսակցությունների հետ պայմանավորվածություն է ունեցել՝ տեղից արձագանքում է ակտիվիստ Սոֆյա Հովսեփյանը, ապա խոստովանում, որ բողոքի հասունացած փուլում պայքարի գլխին պետք է կանգներ որևէ կուսակցություն, սակայն այդպես չեղավ, քանի որ կուսակցությունները հրապարակ բերեցին իրենց անձնական ամբիցիաները:
Պայքարն ավելի շատ մարդկանց ոտքի կհաներ, եթե բարձրաձայնվեին Ռուսաստանի հետ կապված մտահոգությունները՝ կարծում է գրող-հրապարակախոս Վահրամ Մարտիրոսյանը:
«Էլեկտրիկ Երևան»-ից հետո հասարակությունը փոխվել է, ոստիկանությունը չի փոխվել: Ոստիկանության՝ թվացյալ փոփոխությունը սոցիոլոգ Վարդան Հարությունյանը խաբուսիկ է համարում: