ԱՄՆ Հայ դատի հանձնախումբը դիմել է Վաշինգտոնին՝ պահանջելով ավելացնել Լեռնային Ղարաբաղին տրամադրվող ֆինանսական օգնության չափը և նպաստել հայ-ամերիկյան առևտրային կապերի ուժեղացմանը։ Այս մասին հայտնում է asbarez.com-ը՝ նշելով, որ պահանջները հաջորդել են նախագահ Բարաք Օբամայի կողմից 2017 ֆինանսական տարվա բյուջեի նախագծի ներկայացմանը։
Նախագահն առաջարկել է Հայաստանին որպես տնտեսական օգնություն հատկացնել 22.412.000 դոլար, ինչն անցած տարվա համեմատ 22 տոկոսով ավելի է։ Բյուջեի նոր նախագծով Ադրբեջանին կհատկացվի 10.936.000 դոլար։ Ռազմական ոլորտի տարբեր ծրագրերին աջակցելու համար Հայաստանին ու Ադրբեջանին առաջարկվել է հատկացնել հավասարաչափ գումար` 1.6-ական մլն դոլար։ Նախագահի առաջարկով հավելյալ 1.7 մլն դոլար կհատկացվի Հայաստանին` թմրանյութերի տարածման դեմ պայքարի նպատակով։
ԼՂ-ին տրամադրվելիք ֆինանսական օգնության վերաբերյալ հստակ տվյալ չկա։ Անցած մի քանի տարիներին ԱՄՆ-ը միջինը 1.5 մլն դոլար է հատկացրել ԼՂ-ին: Հայ դատի հանձնախմբի գործադիր տնօրեն Արամ Համբարյանը պահանջել է, որ ԼՂ-ին ԱՄՆ կողմից տրամադրվի 5 մլն դոլար։ Բացի դրանից՝ Հայ դատի հանձնախումբը պահանջում է Հայաստանին տրամադրվելիք տնտեսական օգնության չափը հասցնել 40 մլն դոլարի, ինչպես նաև 10 մլն դոլար հատկացնել Սիրիայից փախած և Հայաստանում ապաստան գտած 20 հազար անձանց օգնության համար:
Հայ դատի հանձնախումբն առաջարկում է Վրաստանին տրամադրվելիք ֆինանսական օգնության առնվազն 10 տոկոսը հատկացնել Սամցխե-Ջավախք շրջանում աշխատատեղերի ստեղծմանը։