2015 թվականի ընթացքում Հայաստանում փոքր և միջին ձեռնարկություններ ավելի շատ բացվել են, քան փակվել: Էկոնոմիկայի նախարար Կարեն Ճշմարիտյանը տնտեսության զարգացման կարևորագույն խթան հանդիսացող ՓՄՁ-ներին վերաբերող այս ցուցանիշը դրական ազդակ է համարում:
Հայաստանի գործատուների միության նախագահ Գագիկ Մակարյանը, լավատեղյակ լինելով ՓՄՁ-ների գործունեությունից, էկոնոմիկայի նախարարի այս գնահատականը պարզունակ է համարում: Նրա դիտարկմամբ՝ միայն վիճակագրական տվյալների հիման վրա և առանց վերլուծությունների հնարավոր չէ իրավիճակը ճիշտ գնահատել:
Կոռուպցիա, մոնոպոլիա, անհավասար մրցակցություն. սրանք են թերևս ՓՄՁ-ների զարգացման գլխվոր խոչընդոտները, ընդգծում է Մակարյանը:
Այսօր էլ կառավարության նիստի ընթացքում տնտեսական մրցակցության պաշտպանության պետական հանձնաժողովի նախագահ Արտակ Շաբոյանը, խոսելով բենզին գների վերաբերյալ առկա դժգոհությունների ու կասկածների մասին, վստահեցրեց, որ Հայաստնում չկա ո՛չ մրցակցության սահմանափակման և ո՛չ էլ մուտքի խոչընդոտման երևույթներ:
Դիմել են թե կդիմեն հանձնաժողովին մուտքի խոչընդոտման խնդրով դժվար է ասել, սակայն փաստ է, որ տնտեսական մրցակցության պաշտպանության պետական հանձնաժողովի նախագահ Արտակ Շաբոյանը ռուսական Ռոսնեֆտից ներկրվող ու Հայաստանում ռուսաստանյան գներից կրկնակի անգամ թանկ բենզինի գինն ադեկվատ է համարում:
Հայաստանի գործատուների միության նախագահ Գագիկ Մակարյանը սակայն հակադարձում է՝ Հայաստանում հասարակ ձեռներեցը չի կարող բենզին ներկրել: