Ազգային ժողովի ՀՀԿ խմբակցության պատգամավոր Արտակ Դավթյանը, «Առաջին լրատվական»-ի հետ զրույցում անդրադառնալով սահմանադրական փոփոխությունների քարոզչությանը, կարծիք հայտնեց, որ և «այո»-ի, և «ոչ»-ի կողմնակիցները հավասարապես կարողանում են ներկայացնել իրենց դիրքորոշումները. «Իսկ թե որ դիրքորոշումն է գերակշռում, ապա խորհուրդ կտամ սպասել ևս մի քանի օր, և դեկտեմբերի 6-ը կտա բոլոր հարցերի պատասխանները»:
«Մեր հանրապետությունում հանրային պահանջը չէ, որ ծնում է սահմանադրական փոփոխությունների անհրաժեշտություն: Հանրությունն, իհարկե, ունի բազում խնդիրներ, և դաշտը բավականին նեղ է, բայց սա ամենևին չի նշանակում, որ պատասխանատու մարդիկ չպետք է գնային այս փոփոխություններին»,- ասաց մեր զրուցակիցը:
Հարցին՝ արդյոք իշխանությունները մտավախություն չունե՞ն դեկտեմբերի 1-ին մեկնարկելիք հանրահավաքներից, Արտակ Դավթյանը պատասխանեց. «Մենք բազմիցս ենք ականատես եղել աշխարհացունց հայտարարությունների: Ի վերջո՝ դեկտեմբերի 6-ն էլ կգա կանցնի: Ինչ վերաբերում է վաղվա հավաքներին, ապա դա իրենց մարտավարությունն է, իրենց իրավունքը, սակայն եթե այդ իրավունքների իրացումը խանգարի այլոց իրավունքներին, և անցնեն օրենքի սահմանը, ես կարծում եմ՝ այստեղ կավարտվեն քաղաքական գործընթացները, և կգա իրավական գործընթացը, որի համար կան իրավապահներ, որոնք կգործեն իրենց վերապահված իրավունքների և լիազորությունների շրջանակներում»:
Նրա խոսքով՝ Սահմանադրությամբ իշխանությունը պատկանում է ժողովրդին, և կլինի այնպես, ինչպես ժողովուրդը կորոշի:
