Ռեժիսոր Ռոման Պոլանսկուն ԱՄՆ չարտահանձնելու կրակովյան դատարանի որոշումը վերջնական է դարձել, քանի որ քաղաքային դատախազությունը մտադիր չէ բողոքարկել այն: Associated Press-ի հաղորդմամբ՝ դատախազները նշել են, որ ոչ մի հիմք չեն գտել բողոքարկման համար և համաձայն են դատարանի փաստարկների հետ:
Այդպիսով, Պոլանսկու գործը Լեհաստանում փակել են. ռեժիսորը կարող է ազատորեն մտնել երկիր, ապրել, հանգստանալ կամ աշխատել՝ առանց կրկին դատարանում հայտնվելու ռիսկի:
Լեհաստանը Պոլանսկուն ԱՄՆ-ին չհանձնելու որոշում է ընդունել 2015թ. հոկտեմբերի 30-ին: Դատավորները նշել են, որ ռեժիսորն անարդարացիորեն է մեղադրվել, և ԱՄՆ-ում նրան կարող է ոչ արժանի պատիժ սպառնալ:
Ռեժիսորը ձերբակալվել է 2009թ. սեպտեմբերի 26-ին, Ցյուրիխում՝ ԱՄՆ իշխանությունների կողմից տրված ձերբակալման օրդերի հիման վրա: Ամերիկյան արդարադատությունը մինչ այժմ չի փակել ռեժիսորի դեմ հարուցված 33 տարվա վաղեմության դատական գործը:
Անցյալ դարի 70-ական թվականներին Պոլանսկուն մեղադրանք է ներկայացվել 13-ամյա Սամանտա Գեյմերի հետ անօրինական կապ հաստատելու համար: 2009թ. դեկտեմբերին մի քանի ամիս Շվեյցարիայի բանտում անցկացնելուց հետո Պոլանսկին գրավի դիմաց ազատ է արձակվել և տնային կալանքի ենթարկվել: Այդ կարգավիճակում ռեժիսորը մնացել է մինչև 2010թ. հուլիսը, երբ Շվեյցարիայի իշխանությունները որոշում կայացրին չհանձնել նրան ԱՄՆ-ին: Դրանից հետո նա անմիջապես լքել է Շվեյցարիայի սահմանները:
