Քանի դեռ Մոսկվան հետաքրքրված չէ Լեռնային Ղարաբաղի հարցի լուծմամբ, որևէ հնարավորություն չկա տարածաշրջանում հաստատուն խաղաղության համար, նույնիսկ եթե Բաքուն և Երևանը պատրաստ լինեն զիջումների:
«Ռեգիոն» հետազոտական կենտրոնի կազմակերպած առցանց մամլո ասուլիսի ընթացքում այսպիսի կարծիք է հայտնել Վարշավայի Միջազգային հարաբերությունների լեհական ինստիտուտի վերլուծաբան Կոնրադ Զաշտոֆտը:
Որքանո՞վ են ճիշտ Մոսկվային ուղղված այն մեղադրանքները, որ Ռուսաստանն է հրահրում սահմանային բախումները հակամարտության գոտում:
Պատասխանելով «Առաջին լրատվական»-ի այս հարցին` Զաշտոֆտն ասել է. «Իրականում Ռուսաստանն անմիջականորեն չի սադրում ինչ-որ բախումներ Հայաստանի և Ադրբեջանի սահմանին, բայց այն փաստը, որ նա շարունակում է զենք վաճառել հակամարտության երկու կողմերին էլ, Կրեմլին պատասխանատու է դարձնում ապագայում նոր հնարավոր պատերազմի համար»:
Ըստ նրա` այսօր Ղարաբաղյան հիմնախնդիրը հիշեցնում է ավելի շատ «թեժ», քան թե «սառեցված» հակամարտություն: Փորձագետը չի բացառել նոր` լայնածավալ պատերազմի հավանականությունը` ասելով, որ քանի դեռ հայկական և ադրբեջանական ուժերի միջև չեն տեղակայվել խաղապահ ուժեր, վտանգը կպահպանվի: Բայց միջազգային հանրությունն էլ ի վիճակի չէ նոր առաջարկներ անել Ղարաբաղի հարցով, նույնիսկ եթե իրավիճակը տարեցտարի ավելի վտանգավոր է դառնում. «Դա անհնար է` առանց Ռուսաստանի ցանկության»:
«Ղարաբաղյան հարցը արագ լուծելու սցենար չկա, և ներկայիս պայմաններում առաջընթացը քիչ հավանական է: Այսօր Ռուսաստանը ամենաազդեցիկ արտաքին ուժն է, որն ազդեցություն ունի Ղարաբաղյան հակամարտության վրա: Դրա հետ մեկտեղ` Մոսկվան շահագրգռված չէ այս հիմնախնդրի լուծմամբ: Հակամարտությունն օգտակար գործիք է Կրեմլի ձեռքում Երևանի և Բաքվի հետ քաղաքական խաղերի համար: Քանի դեռ Կրեմլը շարունակում է պահպանել Արևմուտքի հանդեպ սառը պատերազի նոր մոտեցումը, ցանկացած դրական փոփոխություն՝ կապված Լեռնային Ղարաբաղի հակամարտության հետ, անհնար է: Այստեղ չի լինելու միջազգային կոնսենսուս»,- ընդգծել է Կոնրադ Զաշտոֆտը:
