«Չեք անցկացնի» նախաձեռնության անդամ Դավիթ Հովհաննիսյանն այսօր զրուցեց «Առաջին լրատվական»-ի հետ . «Մեզ մնում է միայն մի կողմ շրջել այս էջը և անցնել փողոցային պայքարի: Մենք 30-ից ավելի նախաձեռնությունների ու կազմակերպությունների հետ ենք համագործակցում, կհամագործակցենք բոլոր այն ուժերի հետ, ովքեր կհայտարարեն, որ դեմ են սահմանադրական փոփոխություններին և այս ռեժիմին: Սա պայքար է Հայաստանի քաղաքացու և այն վարչակազմի, ռեժիմի միջև, որը փորձում է քաղաքացուց խլած իշխանությունը պահել, վերարտադրվել և հավերժ մնալ իշխանության: Բնականաբար քաղաքացին իր խոսքը պիտի ասի փողոցում, արտահայտվելու որևիցե այլ տեղ չունի քաղաքացին, լրատվամիջոցները վերահսկվում են իշխանության կողմից, իսկ ԱԺ-ն գերեվարված է այդ վարչախմբի կողմից»:
«Չեք անցկացնի» նախաձեռնության անդամը նաև տեղեկացրեց, որ արդեն նշանակվել է նոր հանրահավաք՝ հոկտեմբերի 30-ին: Սահմանադրական փոփոխությունները, ըստ նրա, լավագույն առիթն է, որ կարող է մարդկանց ոտքի հանել:
Դ. Հովհաննիսյանի հավաստմամբ՝ Հայաստանում գործող դեսպանատների հետ աշխատանք է տարվում, որը անընդհատ պրոցես է. «Անընդհատ կապի մեջ ենք նրանց հետ, և՛ դեսպանների հետ է հանդիպում եղել, և՛ դեսպանատների ներկայացուցիչների հետ, նամակագրություն էլ է եղել, բոլորի հետ համագործակցությունը արդյունավետ է»: