Ինտերնետային գովազդի ԱՄՆ-ի շուկան 2010 թ.ն աճել է 15%-ով և հասել 26 մլրդ դոլարի, որը ռեկորդային ցուցանիշ է ինտերնետի պատմության մեջ: Այս մասին վկայում են աուդիտորական հետազոտական PriceWaterhouseCoopers (PWC) ընկերության տվյալները, որոնք մեջբերում է Associated Press գործակալությունը:
Նախորդ ռեկորդը սահմանվել է 2008 թ., երբ ինտերնետի գովազդից ստացված եկամուտները կազմել են 23,4 մլրդ դոլար:
2009 թ. ֆինանսական ճգնաժամի հետևանքով այն նվազել էր 3%-ով: Այն, որ շուկայի այս հատվածը բարելավել է իր ցուցանիշները, արդեն պարզ էր նախորդ տարվա երրորդ եռամսյակում, երբ ամերիկյան ընկերությունները 6,4 մլրդ դոլարի գովազդ տեղադրեցին համացանցում: Չորրորդ եռամսյակում համացանցում գովազդից ստացված ընդհանուր եկամուտները կազմել են 7,4 մլրդ դոլար՝ դրանով իսկ սահմանելով նոր ցուցանիշ:
Հետազոտության ժամանակ մասնագետներն առաջին անգամ վերլուծության են ենթարկել բջջային շուկայի գովազդը: Մոտավոր հաշվարկներով, այն կազմել է 500-600 մլն դոլար:
