Իրանը աշխարհի համար շատ ավելի վտանգավոր է, քան ԴԱԻՇ-ի (Իրաքի և Շամի իսլամական պետություն) գրոհայինները, եթե հասանելիություն ստանա միջուկային զենքին: Այս մասին հայտարարել է Իսրայելի վարաչպետ Բենիամին Նեթանյահուն, հայտնում է rosbalt.ru-ն՝ հղում անելով եվրոպական ԶԼՄ-ներին:
«Ինչքան էլ սարսափելի լինի ԴԱԻՇ-ը, Իրանը՝ մեր դարաշրջանի առաջին ահաբեկչական պետությունը, հարյուր կամ նույնիսկ հազար անգամ ավելի վտանգավոր կլինի, երբ միջուկային զենք ստանա»,- ասել է Նեթանյահուն:
Նա նաև նորից նշել է, որ դժգոհ է Իրանի միջուկային խնդրի վերաբերյալ Թեհրանի և «վեցյակի» բանակցություններից:
Ըստ Նեթանյահուի՝ այդպիսի համաձայնագիրը ոչ միայն Իրանին չի կանգնեցնի միջուկային զնեք ստանալու ձգտման մեջ, այլև նրան հնարավորություն կտա զգալիորեն բարելավել իր տնտեսության վիճակը:
