Թուրքիայի իշխանությունները մտադիր են քանդել Ստամբուլի Թուզլա թաղամասի «Քամփ Արմեն» հայկական մանկական ճամբարը, որը կառուցել են հայ որբերը 1960-ականներին, և այդ վայրում էլիտար թաղամաս հիմնել։ Այս մասին գրում է թուրքական «Ջումհուրիյեթ» թերթը։
Այս առթիվ սոցիալական ցանցում ստեղծվել է #KapmArmen հեշթեգը։ Բազմաթիվ օգտատերեր քննադատում են հայկական ճամբարը քանդելու՝ թուրքական իշխանությունների մտադրությունը և հանդես են գալիս ««Քամփ Արմենը» չենք հանձնելու կապիտալիստներին» կարգախոսով։
Նշենք, որ Գեդիքփաշայի հայ բողոքական եկեղեցու հիմնադրամը 1961 թվականին Դուրմազ ընտանիքից գնել է Թուզլայում գտնվող հողատարածքը և այն գրանցել հիմնադրամի անունով: Ճամբարի հիմքը գցվել է 1962 թվականի հունվարի 6-ին։ Շինարարական աշխատանքներին մասնակցել են հայ որբերը, որոնց թվում է եղել նաև Թուրքիայում լույս տեսնող հայկական «Ակօս» շաբաթաթերթի նախկին գլխավոր խմբագիր Հրանտ Դինքը, որը ճամբարն անվանում էր «Ատլանտիդայի քաղաքակրթություն»:
1974 թվականի դատարանի որոշմամբ 60-70-ականներին գործած հայկական մանկական ճամբարը առգրավվել է և վերադարձվել նախկին սեփականատիրոջը։
