Այսօր ԱԺ նախագահ Գալուստ Սահակյանից «Առաջին լրատվական»-ը հետաքրքրվեց՝ արդյոք մեզ պատիվ բերո՞ւմ էր ապրիլի 24-ին ունենալ կամ ավելացնել քաղբանտարկյալների թիվը, մասնավորապես, «Հիմնադիր խորհրդարանի» անդամները երկամսյա կալանքի տակ են։ ԱԺ նախագահի դիտարկմամբ՝ վտանգավոր պրոցեսներ կան, ազգային խնդիրների թատերաբեմում քաղաքական ինչ-որ տվայտանքների առումով հեռանկարներ պետք է հյուսվեն։
«Դա չեմ համարի դավաճանություն, համենայն դեպս` ճիշտ չէր», նշեց նա։
Հարցին՝ իսկ ի՞նչն էր վտանգավոր «Հիմնադիր խորհրդարանի» անդամների գործողություններում, որ անհրաժեշտություն առաջացավ նրանց կալանավորելու, Գալուստ Սահակյանն ասաց.«Դուք պատկերացնո՞ւմ եք, եթե այդ ոչ տրամաբանական հոտը քաղաքական դաշտ չմտներ, կունենայինք ոչ թե 3-4 նախագահների այցեր, այլ կունենայինք 15 այցեր: Նախորդ հայտարարություններում նաև դիտարկվում էր հետևյալը. եթե երկրի ազգաբնակչությունը գաղթական է դառնում, եթե պետությունը վերանում է, ինչ է պատահել, որ մի քիչ էլ զոհեր ունենանք։ Այս հայտարարությանը տեղյակ չե՞ք։ Ես գիտեմ, որ նրանք էդ թիմը չեն։ Նախ դուք էդ թիմին չեք ճանաչում, ոչ էլ Ժիրայրին եք ճանաչում, որ կկարողանար այդպիսի բաներ անել։ Համենայն դեպս աշխարհի համար դա ահաբեկչության մոտիվացիա է»,-ասաց նա։
Մեր դիտարկմանը՝ որ նրանք հայտարարում էին ինքնազոհողության մասին, հանուն երկրում փոփոխությունների, Գալուստ Սահակյանը նշեց.«Այսինքն` ուզում էին ապրիլի 24-ին Եղեռնի հուշարձանի մոտ զոհվեի՞ն, մատաղ դառնայի՞ն։ Մենք մեր տրամաբանությամբ ոչինչ չենք տեսնում, որովհետև ոչ այդ արժեհամակարգը կա, ոչ էլ ուժը, բայց երբ ամբողջ աշխարհը նայում է Հայաստանին ու Ցեղասպանության միջոցառումներ պիտի լինի, դու իտալացուն չես կարող բացատրել, որ Ժիրայր Սեֆիլյանն այդքան չէ, որ կարողանա։ Նախ` քրեական գործ է բացված, ի միջիայլոց դա էլ եմ ես սրբացնում, մեր ազգի բնավորությունը։ Մարդը ինչ գործողություններ էլ անում է, երբ տուժողի դերում է հանդես գալիս, բոլորը ոգևորված կանգնում են նրա կողքը։ Դա, կարծում եմ, մեր պատմության հետևանքն է։ Ժիրայր Սեֆիլյանն իր ամբողջ թիմով այն չափը, որ ունի, հրաշք է, այդ չափից ավելին ծիծաղելի է»։