Մեծ Բրիտանիայում Քեմբրիջի համալսարանի տարածքում գտնվող Սենթ-Ջոնս քոլեջի շենքի տակ հայտնաբերվել է միջնադարյան գերեզմանոց, որում եղել է ավելի քան 1300 գերեզման: Պարզվել է՝ ներկայիս քոլեջի տարածքում Սուրբ Հովհաննես Ավետարանիչի հիվանդանոցի մոտ կառուցված գերեզմանոցում հուղարկավորել են հիմնականում բնակչության աղքատ շերտերից գիտնականների: Այս մասին հայտնում է բրիտանական The Independent պարբերականը:
Հաղորդվում է, որ գերեզմանոցը հայտնաբերել են դեռ 3 տարի առաջ Քեմբրիջում Սենթ Ջոնսի քոլեջի շենքի տակ կատարված պեղումների ժամանակ, սակայն դրանց արդյունքները միայն այժմ են հրապարակվել: Վիկտորինյան դարաշրջանի շենքի տակ հնագետները գտել են 1300 գերեզման, ինչպես նաև 400 ամբողջական կմախք: Պարզվել է՝ գերեզմանները XIII-XV դարերի են:
Հաղորդվում է, որ գերեզմանոցը պատկանել է Սուրբ Հովհաննես Ավետարանիչի միջնադարյան հիվանդանոցին, որը գոյություն է ունեցել մինչև 1511թ.:
Հնագիտության և մարդաբանության ֆակուլտետից Քրեյգ Սեսֆորդը պարբերականին ասել է, որ հայտնաբերված գերեզմանոցն իր տեսակի մեջ խոշորագույն գտածոներից է Մեծ Բրիտանիայում:
Գերեզմանոցում հայտնաբերված աճյունների ճնշող մեծամասնությունն առանց դագաղի է եղել: Թաղվածների մոտ ոսկյա կամ այլ անձնական իրեր գործնականում չեն եղել: Սա բացատրվում է նրանով, որ գերեզմանոցը կառուցված է եղել չունևորների համար: Կանանց և երեխաներին պատկանող աճյուններն ավելի քիչ են եղել:
Միջնադարյան գերեզմանոցի մոտ հետազոտողները նաև հայտնաբերել են մանրախիճ ուղիներ, ջրհոր, տարբեր ծաղկող բույսերի սերմեր: Սա վկայում է այն մասին, որ որոշակի ժամանակ գերեզմանոց են գնացել մարդիկ՝ այցելելու իրենց մահացած մտերիմներին:
Չնայած հայտնաբերված գերեզմանոցը ժանտախտի համաճարակի հետ կապող տեղի շշուկներին՝ ուսումնասիրության ժամանակ այդ հիվանդության ոչ մի ապացույց չի հայտնաբերվել: