«Մենք վերջերս վերանայել ենք մեր կանխատեսումները 2015 թվականի համար և կարծում ենք, որ Հայաստանի տնտեսական աճը շատ-շատ քիչ կլինի: Հնարավոր է՝ դրական միտումով, 0.8 տոկոս»,- այսօր լրագրողների հետ հանդիպման ժամանակ պատասխանելով «Առաջին լրատվական»-ի հարցին՝ ասաց Համաշխարհային բանկի հայաստանյան գրասենակի տնօերն Լորա Բեյլին՝ հավելելով. «Բայց այդ փոքր դրական միտումը կարող է բացասական դառնալ, եթե լուրջ ցնցումներ տեղի ունենան: Եվ այդ ցնցումները կարող են լինել հիմնական առևտրային գործընկերների՝ Ռուսաստանի եւ եվրոպայի տնտեսական վիճակի վատթարացման, ինչպես նաև տարադրամի կուրսի կտրուկ տատանման հետևանքով»:
Միևնույն ժամանակ տիկին Բեյլին նշեց, որ ինքը կանխատեսումներ չունի, թե դրամի հետ առաջիկայում ինչ կարող է լինել: «Համաշխարհային բանկը վերլուծում է այն տվյալները, որն իր տրամադրության տակ են: Մենք կարծում ենք, որ հումքային գները, որոնք Հայաստանի համար կարևոր են, մասնավորապես՝ պղնձի, կարող են անկայուն մնալ: Մի քիչ իջնել, մի քիչ բարձրանալ: Բայց հիմնական գործոնը կշարունակի մնալ Ռուսաստանի տնտեսության անկումը»,- ասաց նա:
Լուսանկարը` PAN Photo-ի