«Մարտի մեկը մեր ցավն է, բոլորս էլ սպասումներ ունենք, որ գործը բացահայտվի: Ես մի քանի առիթներով ասել եմ. կարծում եմ՝ քննչական մարմինները նախևառաջ այդ միտինգների կազմակերպիչներին որպես վկա պետք է հարցաքննեն»,- անդրադառնալով Մարտի մեկի իրադարձություններին՝ մեզ հետ զրույցում նշեց ԱԺ նախագահ Գալուստ Սահակյանը:
Մեր դիտարկմանը՝ յոթ տարին արդյոք բավարա՞ր չէր իշխանության համար բացահայտելու Մարտի մեկը, Գալուստ Սահակյանը ասաց. «Ոչ, բաներ կան, որ անհնար է: Պատմության մեջ էլ բաներ կան, որ դեռևս չեն բացահայտվում, բայց այդպիսի բան չի լինում, որ երբևէ չբացահայտվեն, այնպես որ՝ կբացահայտվի: Այստեղ մի կարևոր հանգամանք կա. հասարակությունը միշտ վիրավորված է զգում, որ նման ցավալի իրողությունը դարձնում են քաղաքական շահարկման առարկա և փորձում իրենց քաղաքական զինանոցի տրամաբանությունը հանգեցնել հենց այս դժբախտ երևույթին»,- ասաց նա:
Ինչ վերաբերում է երկրորդ նախագահին պատասխանատվության ենթարկելուն, ապա, Գալուստ Սահակյանի խոսքով, պատասխանատվության պետք է ենթարկվեն նրանք, ովքեր մասնակից են հանցագործությանը:
«Ընդդիմությունը կարող է բոլորին հանցագործ համարել, մասնավորապես այս ժամանակաշրջանում, չունենալով քաղաքական բազա և ամուր ծրագրավորված գործընթացներ՝ փորձում են խոսափողների մոտ հասարակությանը ցույց տալ, որ իրենք ամբողջովին մտահոգված են խեղճ ժողովրդի շահերով, որը բոլորովին այդպես չէ»,- ասաց նա:
Նա նաև նշեց, որ կհամոզի ԿԳ նախարարին երեկոյան դպրոցներ բացել, որ ստահակության մակարդակի որոշ քաղաքացիներ հնարավորինս կարողանան ավելի բարեկիրթ դառնալ:
Ավելին՝ տեսանյութում: