«Ղարաբաղում մարտական գործողությունների վերսկսման հարցը լուրջ հարց է, սակայն այսօրվա իրականության մեջ ստատուս քվոյի խախտումը քիչ հավանական է, քանի որ դա շահավետ չէ ո՛չ Վաշինգտոնին, ո՛չ էլ Բրյուսելին»,- անդրադառնալով ղարաբաղյան հակամարտության կարգավորմանը` կարծիք հայտնեց քաղաքագետ, «Ժողովրդավարության ու համագործակցության» ինստիտուտի Նյու Յորքի բաժանմունքի ղեկավար Անդրանիկ Միհրանյանը և հավելեց, որ Իլհամ Ալիևն ամենախոցելի առաջնորդն է ամբողջ հետխորհրդային տարածքում:
Ըստ քաղաքագետի` չնայած Իլհամ Ալիևի ռազմատենչ հայտարարություններին, նա շատ լավ հասկանում է, որ պատերազմի ելքն անկանխատեսելի է, և որ պատերազմը կարող է կործանարար դառնալ Ալիևի կլանի համար և միլիարդավոր դոլարներ կարժենա:
Խոսելով Սերժ Սարգսյանի ու արտգործնախարար Էդվարդ Նալբանդյանի վարած արտաքին քաղաքականության մասին, Միհրանյանը նշեց, որ այն աննախադեպ է անկախ Հայաստանի պատմության մեջ.
«Ղարաբաղի հարցում Հայաստանի պաշտոնական դիրքորոշումն այսօր լիովին համահունչ է ԵԱՀԿ ՄԽ-ի, ՌԴ-ի ու այլ երկրների դիրքորոշմանը: Անշուշտ, ղարաբաղյան գործընթացում այժմ փակուղային իրավիճակ է, ինչպես և հայ-թուրքական գործընթացում, սակայն այս իրավիճակում մենք ավելի շահեկան վիճակում ենք գտնվում, քանի որ ոչ թե մենք ենք գտնվում ճնշման տակ, այլ ավելի շուտ հակառակ կողմը, որը չի կարողանում բացատրել թե ինչու է գնում այս կամ այն քայլին»: