Մեր հարևան Վրաստանում հագուստի գները թե՛ տոնավաճառներում, թե՛ բրենդային խանութներում էականորեն տարբերվում են հայաստանյան գներից: Շատ հաճախ հանգստի կամ այլ նպատակով Վրաստան մեկնելով՝ մեր համաքաղաքացիները զարմանում են, որ հնարավոր է նման գնային տարբերություն: Տարբերությունը հսկայական է ոչ միայն մեքենաների շուկայում, տուրիզմի ոլորտում, այլ նաև հագուստի շուկայում:
«Առաջին լրատվական»-ի փոքրիկ հետաքննությունը Վրաստանի բրենդային խանութներում և շուկայում նման պատկեր արձանագրեց: «Zara» բրենդի կանացի վերարկուն Հայաստանում արժե 59.900 դրամ կամ 124 դոլար (ԿԲ հունվարի 20-ի փոխարժեքով), նույն վերարկուն Վրաստանի նույն բրենդի խանութում վաճառվում է 199 լարիով կամ 103 դոլարով (լարին դոլարով արտահայտվել է Վրաստանի ԿԲ-ի հունվարի 7-ի փոխարժեքով):
«Mango»-ի հայաստանյան խանութը կանացի տաբատն առաջարկում է 27. 000 դրամով կամ 56 դոլարով, Վրաստանում նույն տաբատն արժե 99 լարի կամ 51 դոլար: Bata կանացի կիսաճտքավոր կոշիկը Վրաստանում արժե 125 լարի կամ 64 դոլար, նույնը Հայաստանում՝ 37 500 դրամ կամ 77 դոլար:
Մարքեթինգի մասնագետ Լաուրա Կարապետյանն «Առաջին լրատվական»-ի հետ զրույցում տեղեկացրեց, որ բրենդային հագուստների համար Հայաստանի և Վրաստանի գների մեջ տարբերություն չպետք է լինի, քանի որ բրենդի գրասենյակը բոլորի համար նույն գինն է սահմանում՝ անկախ արժույթի տատանումներից և այլ ֆորսմաժորային իրավիճակներից:
«Բրենդը երկիր բերող կողմը պայմանագային պարտավորություն ունի գների հետ կապված, նա չի կարող երկրում ֆինանսական շոկերի պատճառով փոփոխություններ անել, զեղչեր հայտարարել և տարատեսակ առաջարկներ անել կամ հակառակը՝ գներ բարձրացնել: Նման դեպքերում մյուս կողմը կարող է խզել պամանագիրը՝ տույժերի և տուգանքների ենթարկելով ներկայացուցիչ կազմակերպությանը»,- տեղեկացրեց մասնագետը:
Գնային տարբերություն չկա, օրինակ, Aldo խանութների ապրանքների միջև. տղամարդու նույն կոշիկը և՛ Վրաստանում, և՛ Հայաստանում դոլարային արտահայտությամբ արժե 160 դոլար, Nextի՝ 3-6 ամսական աղջիկ երեխայի վերարկուն երկու երկրների խանութներում նույն գինն է՝ 42 դոլար:
Տոնավաճառներում գնային տարբերությունն ավելի մեծ է: Եթե տղամարդու նույն վերնաշապիկի գները տատանվում են 15-25 լարի կամ 8-13 դոլարի շրջանում, միևնույն ժամանակ գրեթե նույն որակի վերնաշապիկները Մալաթիա տոնավաճառում արժեն 7000-15 000 հազար դրամ կամ 14.5- 31 դոլար: Վրաստանի LCWaikiki-ում այս պահին հնարավոր է 15-20 լարիով վերնաշապիկ գնել, 80-90 լարիով՝ վերարկուներ, ձմեռային վերարկուները՝ 130 լարիով: Այս առաջարկն էականորեն տարբերվում է նման բրենդների հայաստանյան առաջարկից:
Այսօր Երևանի տոնավաճառների աշխատակիցներն ապրանքների բարձր գինը պայմանավորում են մաքսազերծման գումարով և ճանապարհածախսով, սակայն եթե վերցնենք վերնաշապիկների գները, որի տարբերությունը երկու երկրների առաջարկի միջև մոտ 6-18 դոլար է, դժվար թե մեկ անուն ապրանքի մաքսազերծումը և ճանապարհածախսը նման գումար կազմի:
Վրաստանի սահմանին մոտ համայնքների բնակիչներն ավելի քաջատեղյակ են այս գներին, նրանք նախընտրում են ընտանիքի անդամներով գնալ և իրենց հագուստը, պարենը և այլ անհրաժեշտ ապրանքներ ձեռք բերել Վրաստանից: