Վատերլոոյի ճակատամարտում հաղթանակը տարել է Նապոլեոն կայսրը, այլ ոչ թե դուքս Արթուր Վելինգթոնը՝ հաստատում է ֆրանսիացի փաստաբան Ֆրանկ Սամսոնը։ Այս մասին գրում է The Daily Mail-ը։ Հայտնի ճակատամարտի 200-ամյակի առիթով պատմական իրադարձությունների վերստեղծման մեջ Սամսոնը կխաղա Նապոլեոնի դերը։
Ֆրանսիացին պնդում է, որ 1815 թվականի հունիսի 18-ի իրական հերոսը եղել է Նապոլեոնը։ Սամսոնը կայսերն անվանել է մեծագույն մարդկանցից մեկը, իսկ դուքսին անվանել «սասափելի անգլիացի, որի մասին ոչ ոք չի լսել»։ Ինչպես կարծում է ֆրանսիացին, պատմական տեսանկյունից հաղթանակը տարել է Նապոլեոնը։
Իր հերթին, պատմաբան և հաղորդավար Ջեյմս Հոլանդը Սամսոնի հայացքները հիմար է անվանել։ Նա նշել է, որ Վատերլոոյի ճակատամարտը դարձել է Նապոլեոնի ռազմական և քաղաքական կարիերայի ավարտը։
Ճակատամարտի 200-ամյակը կնշվի Բելգիայում 2015-ի հունիսին՝ երկու օրվա ընթացքում։ Պատմական արարողությանը կմասնակցի 5000 մարդ։ Կլինեն 300 ձիեր և 100 թնդանոթներ։ Կազմակերպիչները խոստացել են, որ հաղթողը Նապոլեոնը չի լինի։ «Ես ամեն անգամ պարտվում եմ»,- ասել է Սամսոնը, որը կայսերը մարմնավորել է ճակատամարտի 189 բեմադրություններում։
