Թուրքիան պատրաստ է ԱՄՆ-ին իրավունք տալ օգտագործելու Ինջիրլիք ավիաբազան ԴԱԻՇ-ի («Իրաքի և Շամի իսլամական պետություն») դեմ պայքարում՝ միայն այն դեպքում, եթե Վաշինգտոնը համաձայնի կատարել Սիրիայում «ինտեգրված ռազմավարություն» իրականացնելու Անկարայի պահանջը: Այս մասին The Washington Post թերթին տված հարցազրույցում հայտարարել է Թուրքիայի վարչապետ Ահմեդ Դավութօղլուն:
Նա նշել է, որ այդպիսի «ինտեգրված ռազմավարություն» ասելով՝ Թուրքիան հասկանում է Սիրիայի օդային տարածքում «թռիչքների համար փակ գոտու և սահմանամերձ շրջաններում փախստականների համար անվտանգ կացարանի ստեղծումը»: «Որպեսզի այլևս փախստականների հոսք չլինի Թուրքիա»,- նշել է Դավութօղլուն: Նրա խոսքով՝ «մենք չենք ուզում փախստականների հետագա հոսքեր կամ սիրիական ռեժիմի կողմից օդային ռմբակոծություններ տեսնել»:
Դավութօղլուի տեղեկացմամբ՝ Թուրքիայի և ԱՄՆ-ի միջև անցած տարի «գործնականում ձեռք է բերվել համաձայնություն» ԴԱԻՇ-ի դեմ պայքարում Ինջիրլիք ավիաբազան օգտագործելու վերաբերյալ: «Եվ համաձայնությունը դեռ հնարավոր է»,- նշել է Դավութօղլուն:
Դավութօղլուն չի թաքցրել, որ Անկարան շարունակում է պնդել, որպեսզի Սիրիայում «երկու սպառնալիքներով միաժամանակ զբաղվեն»: Նկատի են առնվել ԴԱԻՇ-ը և երկրի ներկայիս կառավարությունը՝ Բաշար Ասադի գլխավորությամբ: «Եթե մենք ուզում ենք խաղաղություն ունենալ Սիրիայում, մենք միայն մեկ չափանիշ ունենք»,- ասել է Դավութօղլուն: Հարցին՝ արդյոք նա նկատի ունի Ասադի պաշտոնանկությո՞ւնը, Դավութօղլուն դրական պատասխան է տվել: