Ամերիկացի գիտնականները հայտնաբերել են ավելի վաղ անհայտ ձկնատեսակ, որն ապրում է 8 կմ խորության վրա: Այն ամենախորը լողացող ձուկն է, որ մինչ օրս հայտնի է գիտությանը՝ հաղորդում է Los Angeles Times-ը:
Հետազոտական խումբը նոր ձկանը հայտնաբերել է Մարինյան իջվածքում: Նրա համար դեռ անվանում չեն գտել:
«Մենք ցնցված էինք, երբ տեսանք նրան: Նավի վրա գտնվողներից մեկն ասաց, որ այն գտնվում է շան ձագի, հրեշտակի և օձաձկան միջև»,- հայտարարել է կենսաբանության պրոֆեսոր Փոլ Յենսին:
Գիտնականները ձկանը պատահաբար են հայտնաբերել: Այն հայտնվել է տեսախցիկի օբյեկտիվում, երբ լողում էր ծովի հատակից հողի նմուշներ հավաքող սարքավորման կողքով:
Ձուկն ունի մոտավորապես 25 սմ երկարություն, այն գրեթե թափանցիկ է, իսկ կմախքը երևում է մաշկի տակից:
