Գիտնականները վաղուց են խոսում այն մասին, որ հաջող կարիերա կառուցեու համար բնավորության որոշակի գծեր, այլ ոչ թե ինտելեկտ է հարկավոր: Գրիֆիտի համալսարանի գիտնականները պարզել են, որ անձնական հատկանիշները կրթության մեջ մեծ դեր են խաղում: Հոգեբանները վերլուծել են մարդկային հիմնական հատկանիշները (բարեխղճություն, անկեղծություն, զգացմունքային կայունություն) և դրանք համադրել են առաջադիմության հետ, գրում է Psych Central-ը:
Պարզվել է, որ ուսանողի կողմից սեփական անձի բնութագրումը կարող է ճշգրտորեն ցույց տալ նրա ակադեմիական առաջադիմությունը: Արդյունքն ավելի հստակ է եղել, եթե ուսանողին բնութագրել են նրա մտերիմները: Մարդու անձնական տվյալները նրա առաջադիմության մասին չորս անգամ ավելի հստակ պատկերացում են տվել, քան նրա ինտելեկտը: Ամենից շատ առաջադիմության վրա ազդել են բարեխղճությունն ու անկեղծությունը:
Նախկին ուսումնասիրությունները ցույց են տվել, որ այն ուսանողները, ովքեր իրենք իրենց խելացի են համարում, հաճախ դադարում են սովորել, և նրանց առաջադիմությունը ժամանակի հետ նվազում է: Իսկ նրանք, ովքեր իրենք իրենց աշխատասեր են համարում, ժամանակի հետ ավելի մեծ հաջողությունների են հասնում:
