Կաթնասունների մոտ մատների և սեռական օրգանների ձևավորումը կառավարվում է միևնույն մեխանիզմի կողմից: Նվազագույն մոդիֆիկացիայի արդյունքում այս համակարգը էվոլյուցիայի է ենթարկվել և կիսվել երկու առանձին մեխանիզմների, ընդ որում, անհայտ է, թե որն է առաջինը հայտնվել՝ մատնե՞րը, թե՞ սեռական օրգանները: Այս թեմայով ուսումնասիրությունը ներկայացվել է Science ամսագրում:
Շվեյցարացի գիտնականները ուսումնասիրում են Hox գեների դերը պտղի զարգացման ժամանակ: Դրանց դերը էմբրիոնի հյուսվածքների և օրգանների աճի համար պատասխանատու գեների «միացումը» կամ «անջատումն» է:
Մկների էմբրիոնի ուսումնասիրությունից պարզվել է, որ ԴՆԹ-ի միևնույն հերթականությունները, որոնք գտնվում են Hox գեների հարևանությամբ, կառավարում են այդ երկու խմբի օրգանների ձևավորումը:
«Աշխատում են միևնույն ժառանգական մեխանիզմները: Դրանք խթանում են սեռական օրգանի կամ մատների կազմավորումը՝ կախված ԴՆԹ-ի հերթականությունների ոչ մեծ ֆունկցիոնալ տարբերություններից»,- բացատրում է ուսումնասիրության ղեկավար Դենի Դյուբուլը:
Հասկանալի չէ, թե էվոլյուցիայի ընթացքում ինչն է ավելի վաղ հայտնվել՝ մատնե՞րը, թե՞ արտաքին սեռական օրգանները: Ուսումնասիրության արդյունքները խոսում են այն մասին, որ օրգանների մի խումբը առաջացել է՝ յուրացնելով մյուսի գենետիկական մեխանիզմները: Սակայն դրանց ձևավորման հերթականությունը դեռ հայտնի չէ: Թե մատները և թե սեռական օրգանները կենդանիների ծովային կյանքից ցամաքայինի անցնելու գործընթացում կարևոր դեր են խաղացել. առաջինները օգնել են ակտիվ տեղաշարժին, իսկ երկրորդները ապահովել են ներքին բեղմնավորման արդյունավետ համակարգը: