Ինչպես հայտնի դարձավ օրերս, այս տարի ևս, ըստ Ազգային վիճակագրական ծառայության տվյալների, Հայաստանի ամենաաղքատ մարզը Շիրակի մարզն է, որտեղ բնակչության 46 տոկոսը աղքատ է:
Նշենք, որ Շիրակի մարզն այս հորիզոնականը զբաղեցնում է տարիներ շարունակ, և ուշագրավ է, որ տարեցտարի աղքատության մակարդակը, նվազելու փոխարեն, աճում է: Այսինքն՝ եթե այս միտումը շարունակվի, ապա մենք տարիներ անց Շիրակի մարզում կունենանք աղքատության այնպիսի մակարդակ, ինչպիսին երկրաշարժին հաջորդած տարիներին էր:
Գյումրիի նախկին քաղաքապետ, ՀՀԿ-ական Վարդան Ղուկասյանի կարծիքով՝ 1992 թվականից հետո Շիրակի մարզն ու Գյումրին ամենաաղքատն են ճանաչվում այն պատճառով, որ բոլոր ներդրումներն արվում են Երևանում և Երևանի շրջակայքում, դրա համար էլ աշխատատեղեր չկան: Իսկ որտեղ աշխատատեղ չկա, այնտեղ աղքատության մակարդակը ամենաբարձրն է:
«Մեգապոլիս ստեղծելու միտում կա: Եվ հետո, գյուղեր կան, որ ավելի մեծ արդյունաբերություն, աշխատատեղեր ունեն, քան ՀՀ երկրորդ քաղաքը: Դրա համար ես 96 թվականից բազմիցս ասել եմ, որ որևէ աղետից հետո ազատ տնտեսական գոտի պետք է հայտարարել տվյալ տարածքը: Իսկ այսօր, ցավոք սրտի, ազատ տնտեսական գոտի է ճանաչվում օդանավակայանը, այն տարծքները, որոնք ուժեղ են: Այ, եթե նման մոտեցում լինի Շիրակի մարզի, Գյումրիի նկատմամբ, ապա էդ քաղաքը, մարզը 10 տարվա ընթացքում տեղից կփախչի և չգիտեմ ուր կհասնի»,- «Առաջին լրատվական»-ի հետ զրույցում ասաց Ղուկասյանը:
Այսինքն՝ կառավարման, իշխանությունների սխա՞լն եք տեսնում՝ հարցրինք: «Մնացած մեկնաբանությունը թողնում եմ ձեզ: Ձեր կարծիքով, մարզային ղեկավարությունը ինչ կարող է անել, եթե համալիր մոտեցում չկա: Պետք է պարզապես խթանել փոքր ու միջին բիզնեսը, ինչը, ցավոք սրտի, դադարեցվել է: Փոքր ու միջին բիզնեսը մեռելէ հանրապետության երկրորդ քաղաքում: Իսկ իմ օրոք, ՀՀ բոլոր քաղաքները վերցրած, այդքան շինարարություն չէր արվում մասնավորի կողմից, որքան մեր մարզում, Գյումրիում: Իսկ հիմա ընդամենը մի քանի բենզալցակայան է կառուցվում, իսկ մասնավորի կողմից շինարարություն ընդհանրապես չկա, որովհետև հողհատկացում չի արվում: Իսկ ժամանակին արված հողհատկացումների պատճառով մարդիկ դատարաններում խեղդված են»,- նկատեց նախկին քաղաքապետը՝ հավալելով, որ առանձնապես պետական մոտեցում էլ չկա:
«Մի քանի բնակարան կառուցելով՝ քաղաքը քաղաք չի դառնա: Էստեղ պետք է գործարան կառուցվի: Մի քանի գործարան ունեինք, 10 կոպեկով սեփականաշնորհեցին և հիմա դարձրել են ռեստորան, չգիտեմ ինչ: Իսկ հիմա ասում են՝ թող ներդրումներ անեն: Հիմա մեր բախտն էլ չի բերել, հարուստ գյումրեցի գործարար, ներդրող չունենք, ինչ անեն: Բա պետական մոտեցումը որտե՞ղ պետք է երևա»:
Մեր դիտարկմանը, թե ինքը ևս համարվում է Գյումրիի ամենահարուստ մարդկանցից մեկը, բազմաթիվ բիզնեսներ ունի, նախկինում սեփականաշնորհված շատ հաստատություններ ներկայումս նաև իրեն են պատկանում, ինչո՞ւ է դժգոհում, Ղուկասյանն արձագանքեց. «Ես հնարավորություն ունեմ և հիմա օգտագործում եմ իմ հնարավորությունները: Եվ փառք Աստծո, որ դուրս եկա: Հիմա կաթի վերամշակման գործարան եմ բացում, եկեղեցի եմ կառուցում, անասնապահությունն եմ մեծացնում, չրի արտադրամաս եմ բացում, բայց անհատով հարց չի լուծվի: Համակարգային մոտեցում է պետք»:
Բացի այդ, Ղուկասյանի խոսքով, Շիրակը, Գյումրին առանձնապես չեն օգտվում սուբսիդիաներից, հարկային արտոնություններից, գործարարին տրվող արտոնյալ վարկերից, որ նա էլ կարողանա ներդրում անի Շիրակում, ինչն էլ իր հերթին նպաստում է աղքատության մակարդակի բարձրացմանը:
«Ղեկավարներ կան, որ չեն ուզում՝ Հայաստանում երկրորդ, երրորդ քաղաք լինի: Ուզում են, որ Հայաստանը լինի մի պետություն, իսկ մնացած քաղաքները՝ գյուղաքաղաքներ: Նրանց մոտ ցանկություն չկա, որ Գյումրին լինի երկրորդ քաղաք, Վանաձորը՝ երրորդ, էջմիածինը՝ իր հերթին: Նրանց միայն մեգապոլիս Երևանն է հետաքրքրում, որտեղ ապրում են բոլոր ղեկավարները: Բայց նման մոտեցումը սխալ է, և եթե նրանք դա շուտ չգիտակցեն, հաջորդ տարի մենք ավելի վատ արդյունքներ կարձանագրենք»,- ասաց Ղուկասյանը: Վերջինս, սակայն, չցանկացավ ասել, թե հատկապես ում նկատի ունի, արդեն իսկ Սերժ Սարգսյանի՞ն է քննադատում, թե՞ ոչ:
Լուսանկարը՝ news.am-ի