«Առաջին լրատվական»-ի զրուցակիցն է ԱԺ ԲՀԿ խմբակցության պատգամավոր Լյովա Խաչատրյանը:
-Պարոն Խաչատրյան, այսօր ԱԺ-ն ընդունեց Սահմանամերձ համայնքներին արտոնություններ տալու մասին ՀՀ օրենքի նախագիծը: Ւ՞նչ եք կարծում, մեր օլիգարխները շահագրգռված կլինե՞ն գնալ և ներդրում կատարել նաև սահմանային գյուղերում:
-Թող օրենքը մտնի ուժի մեջ, կյանքը ցույց կտա, իսկ որ սահմանային գյուղերին պետք է օգնել, տալ արտոնություն՝ միանշանակ է, հակառակ դեպքում մենք պարզապես կկորցնենք սահմանապահների այն հատվածը, որ կոչվում է համայնքի բնակիչ. նրանից բացի ոչ ոք չի կարող պահել սահման:
–Այսօր ԲՀԿ-ն երկու օրինագիծ բոյկոտեց: Հնարավո՞ր է՝ ԵՏՄ փաստաթուղթը նույնպես բոյկոտվի ԲՀԿ-ի կողմից:
-Չգիտեմ, որոշում չունենք, առայժմ չի քննարկվել:
-Իսկ Ձեր տեսակետը փաստաթղթի վերաբերյալ, արդյո՞ք ծանոթացել եք:
-Ամբողջությամբ տեղյակ չեմ մանրամասներին, կարծում եմ՝ շատ քչերն են տեղյակ, բայց ցանկացած տնտեսական համագործակցության մեջ մտնելու, մասնակցելուև շահ ստանալու համար պետք է նախ ինքներս պատրաստ լինենք: Մենք այսօր որտեղ էլ մտնենք, մենք ինքներս պարզապես պատրաստ չենք ինչ-որ բան արտահանելու, ինչ-որ ձևով օգտվելու:
–Ինչո՞վ է պայմանավորված:
-Չենք աշխատում, չենք անում զգալի ներդրումներ գյուղատնտեսության ոլորտում: Անցյալ տարվա և այս տարվա բյուջեի մեջ համարյա տարբերություն չկա՝ 1.8 միլիարդի տարբերություն է, այն էլ՝ աշխատավարձով պայմանավորված: Այնինչ ներդրումներ պետք է անես, որպեսզի զարգանա գյուղը: Մենք մեր պահանջները չենք բավարարում, այսինքն՝ մեր ներքին շուկան բաց է մեր առաջ, դա չենք բավարարում, և մեզ թվում է, թե ինչ-որ նոր շուկա է բացվել, և մենք այնտեղ ինչ-որ բան կարող ենք անել: Բայց չէ՞ որ մերը կա. հացահատիկ, թռչնամիս, խոզի միս և այլն, մեծ շարք կարելի է թվարկել, որը մենք ներմուծում ենք: Մենք եթե կարող ենք՝ առաջին հերթին մեր շուկան պետք է փակենք:
-Ձեր կուսակցության շարքերում էլ կան օլիգարխներ, ինչո՞ւ նրանք գյուղատնտեսության ոլորտում չեն անում ներդրումներ:
–Կարծում եմ՝ ընդհանուր է ներդրում չանելու ցանկությունը: Ներդրումային վիճակը երկրում բարենպաստ չէ ներդրումներ կատարելու համար:
-Այս վիճակը ո՞ւր է տանում. երեկ էլ պարզ դարձավ, որ ոչ իշխանական Եռյակը չի համագործակցի իշխանության հետ, և միայն համամասնական ընտրակարգի կամ տասներու կետի շուրջ են առաջարկները:
-Ես չեմ կարծում, որ չի համագործակցելու. առաջարկներն արված են, լուծումները պետք է տրվեն, եթե չեն տալիս, ապա Եռյակը «պեչատ» չունի և որոշում կայացնելու իրավունք չունի:
Արդեն չորս-հինգ ամիս է, այդ 12 կետերը շրջանառության մեջ են, առաջարկված են. սա ժողովրդի, և ոչ թե եռյակի առաջարկն է: Լուծումներ թող տան, եթե ցանկանում են համագործակցել: Համագործակցելը որոշում կայացնել է նշանակում, ոչ թե բրնձել: